Grosmanovi

Moramo se vrnut nazad i poć obać Grosmanoveh ki živu va kuće kontra Ružićeven. Va toj su kuće živeli Pizinovi dokle ni Dane postolar kupil Grosmanovu kuću pul Dukić, pa su se Pizinovi preselili Vicence Homatovoj na prvi pod, a Nando Frdula je tu kuću kupil i dal popravit za bivat va njoj, aš je imela fanj trbuha od starosti pa su to z železnun armadurun regulali da ne gre dalje, da se ne počne rušit. Tu su se preselili Arneštro (Ernest) Grosman i njegova žena Fana (Štefanija), Nandotu sestra, i njihovi sini Branko i Željko i hćer Klara. Stareja hćer Mare, al Marica, je već bila oženjena za Marijana Pizinovega i su živeli pul Emi na gornjen pode. Tako je Nando osigural ovu familiju da nekako prožive, aš je njihu kuću pul Dukić kupil Dane Brozović, postolar. Branko se j´to vreme vrnul z Gline kade je navadil art knjigovesca i finil neč školi, pa se je, leto pred manun zapisal va Učiteljsku školu i tu finil za učitelja 1932. leta. Prvo mesto su mu dali va Hercegovine, blizu Stolca, ja Donji al Gornji Potplat, govorilo se j´po Grade da mu je sad lahko pul tolikeh poplat. Kod školan i dokle ni šal va službu je doma va konobe poveževal knjigi. Tu smo se mi, još školani, zbirali, ćakulali i gledali kako dela, a ja san tako gledajuć fanj tega navadil, pa mi je to z onen, ča me j´navadil Tone Ćiković va građanskoj škole, puno koristilo va živote i danas još koristi kad rabi kakovu knjigu pokrpat al povezat. Željko je va toj konobe čuval kunelići, ki su dobro prihajali za popunit slabahan penžijon Arneštotov za prehranit seh va kuće. Željko je pokle šal nekamo va Hrvasku vadit trgovački posal, je ki put prihajal doma i vavek je ča nevega prinašal za kantat. I on i Željko su bili dobri kanturi, ne jaki ma sigurni po glase.