Hermenegildo Valesio

Poć malo zgorun i obać po kale nazdolun se vide fanj skalini po keh se pride va kuću kade je živel Hermenegildo Valesio, špacakamin i „moj Mima“ a sin „moja Otela“ je bil neč na carinarnice, kašneje na Sušake. Ta Valesio, drugačije ga nisu zvali, je bil z Furlanije, je rad povedal da je bil kod „pompjer“ va teatre va Trste, pa je užal kantat arije z oper, koliko ih je mogal zapametit. Nikad ni po domaću navadil, vavek je neč mešal mej domaćen i talijansken zajikon i si moral jako dobro poslušat ča je z tun mešavinun otel reć.  To je po štature bil visok čovek, škur va lice s črnemi piknjicami po obrazeh kod si ondašnji dimnjačari, a kad bi na Fortice sel na klupu smo se čudili kako će rasplest nogi ke je, sedeć, toliko jako duge zapleteval. To je samo mogal još zubar Hofman.