Jože Burić

Do Baničićeveh se drži mićihna kuća z skodon. Čigova je ne znan. Tu je bival Jože Burić (Josip Jugo od Jug) z ženun Mimun, ka j’ bila od Burićeveh pa su po njoj zvali i Jožeta, a imeli su sina Josipa. Ta Jože je bil graski picaferaj, to će reć da je saku večer na podzime i po zime, važigal ferali po Grade da bi se videlo – onda još ni bilo letriki, bilo je neč malo va Zamete, okol granice z Rekun. Na rame stubica z dvami kukami za obesit na feral, v ruke latica petroja, va žepe fuminanti…. ala h večeru na posal.

H temu je Jože po Grade pilil i cepal drva, kemu je to rabilo, a ko vreme, prej neg ča su prišli tomobili va modu, je pul Gauša bil kućer za pripejat z velun karocun – „lando“ – nevesticu, mladoženju i kumpari va sv. Jelenu i nazad doma na pir. Pametin da su za tu karocu konjen vavek bile poluštrane kopita i hami bili drugačeji. Jože je bil žvelt za pomoć kada se je ki selil z fita na fit po Grade, znalo se j’ kad Jože Burić pomore preselit, niš se neće rovinat. Samo nan je šest puti pomogal. Bi zel sobun Franića Fružu i Cirota Broku, obadva su bili jaki za nosit, a kako će se ča prenest je za to bil odgovoran Jože.