Duhtorova kuća

Na same pridu dve kuće ke su zvali Duhtorova. Duhtor Dabović je najprej bival va kuće pod Belvederon, a potla na jedan pod pa je to prodal Matetu Cucančiću, Klanjcu, ki je prišal bil va Grad da bude glavar na općine. Doma je imel hćer i ženu, ke nisu nikada zihajale z kući, hći bi ki put pošpijala na portun i toliko. Pokle je zdola, va fonde bival Turčinović, ki je prišal bil z Istri, z ženun i dvemi sini: Zdenko i Slavko. Zdenko je negde vadil školu, a Slavko je šal va vojnu muzičku školu va Vršce, kad je finil je va vojske bil muzičar, kade ne znan.

Dabović je pak kupil veću kuću od one ku je prej imel, a ku su sad zvali Cucančićeva, i to od nekega Distmana, ni mu to bilo ime nego je v Opatije delal kod „Dienstmann“, to će reć onisti ki furešton nosi koferi do karoc i od karoci va hotel. Grajani su mu njegoveh zvali Dincmanovi. Bila je žena, sin i dve hćeri. Duhtor Dabović je tu kuću preuredil, z prihoda zada, se šlo va čekalnicu i ordinaciju na jenu stran, a va stan duhtora na drugu. Tu je još fanj let živel i lečil ljudi z Kastavšćini Dabović, pokle je tu bila i ordinacija zubara Hofmana, va kuće je živela gospa duhtorovica, drugačije ju nisu ni zvali, a kako se je zvala ne znan. Sin Milutin je na Sušake hodil va trgovačku akademiju.
Va fonde, kontra Belvederu je živel Golub i njegova žena, ku su zvali Golubica, a to je bil financer va penžijone. Z vrat se zajeno prihajalo va kuhinju, a ž nje va jenu kamaru. Tu su živele dve hćeri: Ema i Ada, i dva sina Franić i Maksić. Dva stareja sina Tončić (Anton) i Ivan su finili za učitelji i bili negde va službe. Tončić je finil školu 1913., a Ive 1920. leta, obadva va Grade. Hćeri nisu imele školi, su doma živele z ocen i materun. Franić, kega su zvali Franić Golub al Fruža je skupa z Ciroton Brokun pilil i cepal drva po Grade, kemu je rabilo, bil je jak manaval i za drugi posli: kakove škuji skopat, ča teško zinest al zipejat na voziće i još ča.
Maksić ni bil posensega na ešere, ni niš mogal delat, je pohajal po Grade, va crekve je po nedeje al kad su ružariji puhal va meh na organe, zapravo pritiskal na meh da puše, tako je pomogal Guštetu Bondetovemu kad bi se strudil. Puno njih su ga imeli za tovara i š njen delali ča ni rabilo. Ki put se moglo š njen i razumno pogovorit. Na nekoliko let pred zadnji rat su se preselili na Sušak, al na Trsat. Va ten dele kući se je se predelalo pa je tu bila Ljekarna, a va kamare zad njun je bival ljekarnik Mađar, ki se zval Garay.
Treba neč reć za duhtora Dabovića. On je 30 al 40 let bil duhtor va Grade za celu Kastavšćinu. Ni se h njemu prihajalo samo saki za se na neč se potužit, on je na si mogući načini nastojal da se ljudi prej boli navade tako živet i čuvat se da bol ne dobiju. Njin je govoril da se čuvaju potni brzo se ohladit, mrzle vodi se napit, leć strujen na umidnu travu i još huje na njoj zaspat i tako puno česa, je savetoval zvončari da se tako grdo ne rivaju, da se potni ne suču spod oneh kož od ovci ča su pod zvoni nosili, da se ne bi prehladili. Va to vreme je bilo lahko dobit jetiku, od škrlatini su deca redovito umirala, tako isto od kozic – aš za te boli va to vreme ni bilo lekarije. Komać pod Talijani va prvoj okupacije su počeli davat serum proti kozic dečine, a kašneje je to bilo sako leto. A od jetiki su umirali saki čas, posebe mlaji ljudi, divojke i mladići.