Gaušova kuća

Kontra oven dven kućan pride vela Gaušova kuća. Mat mi je povedala da je nekada na ten meste, neki Partijarka imel miću kuću, pa je to kupil od njega Jože Gauš, Klanjac, ki je poštu od Matulj s konji va Grad vozil. Pošta je onda bila va Brozovićevoj kuće pul Crekvini, a to je zgleda i starina Pepini, Milana i Daneta Brozovići. Pepina je tu va toj pošte bila kod impjegat, a Jože, kućer, neš semo, neč tamo, bil je fanjski kod mladić – i poboga su se oženili.
Kuća je na Belvedere storena pred kraj pasanega, al na početke ovega stoletja, a po ten kako znutri zgleda su teli opret oštariju, ča su pokle i storili. Jože se ni mogal odnevadit od svojga, furmanskega arta, pa je pul vele kući na pod dozidal i velu štalu za konji, a pred štalun pokril za spravit vozi, karocu i kalesin. Su imeli dva para konji s kemi je Jože, a pokle i njegov sin Šandro š njen, z gori pripejeval drva za goret, na metri, pa su to po Grade prodavali kemu je rabilo za oganj. To bi napejali na podzime, složili bi ti metri se okol kući kod da je ograda, a po zime su to prodavali. Pepina je doma držala oštariju, koliko pametin neč malo let, pokle tega su samo prodavali vino ki pride z vani kupit. Prodavali su dalmatinski drdus, ja san ki put šal tamo kupit kad bi me od doma poslali, za popit ocu za obedon.
Karoca je bila „lando“ – to kod one ča se vide danas na filmeh z Engleske, ni bila kripa kod ča j’ imel Zvanić Petrin, a i kalesin je bil neč veći neg ča su bili drugi po Kastavšćine. Ma su konji bili veli, teški, štajerski, nisu bili za karocu, ma su zato dobro potezali vozi z drvi. Bilo j’ gušta gledat kad bi Jože pejal kemu va Grad drva za goret: konji složno vuču va breg, napored njih Jože na široko hodi i puca s korbačen, nikada ni konji šibal. Čuje se ono furmansko: „Hijo! Bistahar“ ča će reć po nemški: Bis da her! – se do tamo! Je puno puti i četveril kemu drugemu furmanu, kemu nisu mogli njegovi konji zivuć nakrcan voz va breg, od sv. Lucije zgorun do na placu Predgradon.
Njiha nevesta Ljuba, Šandrotu žena, je prihajala nan va kuću, neč matere mojoj pomoć, pa san ja puno puti šal h njin, mi se pijažalo se to okol konji, ma san raji bil z Šandroton, on je umel lepo z dečinun, Jože se vavek neč njurgal, ni mu neč bilo pravo.
Gaušovi su imeli i dve hćeri, ma ih slabo pametin. Više pametin Šandrotu sina Slobodana, kega san pustil mićega kad san šal od domi ća.
Ko vreme su pul njih bili školani na fite. Jedan od teh, Radovan Prnjaić je bil samo jeno leto, ma je Stanke Rokotovoj pustil regal jenega fantinicu, a ja, ča storit, mladen vreme jako brzo pasuje pa bi se………………………………….