Kuća Jožeta Mečulja

Od Belvedera poć zdolun, spod Miminoveh, se pride do noveje kući, ku je negde prej 1930. leta – nad vrati siguro na bangare piše jušto kega leta – storil Jože Mečulj, Brkotov zet za hćer Jeniju (Eugenija) ki je prišal prej rata z Istri, prek Učki z sela Bresta, i z braton Mateton počel pripejevat prasci i prodavat ljuden na prašćarije, ka je zad Brkotovemi bila storena. Kad bi govoril se vavek čulo ono malo po istrijanski, ma je to bil vredan i žvelt čovek, lepe štaturi z velemi, črnemi brki. Ni mu šlo z braton Mateton pa ga j’ pustil ća, a združil se j’ z Bertoton Brkotoven (Albert Dukić), svojen kunjadon, i pametin da su oni dva vavek bili poznati kod trgovci s prasci za su Kastavšćinu. Je proval delat konkurencu Frane Spećina, brat Mihota ki je Predgradon imel kažot, ma mu ni šlo jako za rukun. Berto i Jože, kega su zvali Brkotov, a ne po ten kako se j’ pisal, su ostali poznati i priznati, kade se more kupit zdravi i ješni prasci.
Otac Jože i mat Jenija su imeli dva sina: Josipa i Milana, i dve hćeri Andrijanu i Desanku, ka se j’ rodila neč kašneje, kad su sini već bili narasli, a ka je rano i umrla. Danas je živa samo Andrijana, dovica Adalberta Hosta. Si su bili učitelji samo Desanka ni.
Z Andrijanun skupa smo negde va otobre 1930. leta dočekali na Fortice Vjekoslava Spinčića, ki je prihajal z Beograda i nosil dobri glasi da će se ponovo opret Učiteljska škola va Grade. Ja san ga pozdravil i zahvalil mu za to ča je, za nas školani storil i za naš Grad, a Andrijana mu je zručila boke rožic. Oboje smo mu za ten bušnuli ruku.
Milan je finil Učiteljsku školu skupa z Dušanon Hrenićeven 1931. leta, ma su obadva dve leta čekali da dobiju mesto. Su skupa hodili va Beograd h Miletovemu barbe Franjotu, pa su obahajali po ministarstve ma nisu niš mogli dobro storit. Kašneje je Mile dobil mesto Velika Drenova va centralnoj Srbije, a pokle se bil prehitil nekamo Hrvasku. Smo va nesrećnen rate 1941. leta bili skupa zarobljeni va Oflage VI7B – Warburg bei Kassel – Westfallen, zapadna Nemška. Puno smo puti šetali va žicah, va prvo vreme je bil jako za NDH, ma je pokle videl da je to jena kreatura od državi, ku su strorili fašisti, pa smo samo računali koliko će vremena pasat pa da gremo s teh žic nekamo ća, kamo je je, samo vanka z logora, vanka z žice bodjate.
Andrijana i Berto Host su pak dobili prvo mesto Razbojnu na Kopaonike, ma su pokle leto dan prišli va Hrvasku, kamo ne znan. Josip je od početka bil va Hrvaskoj. Va pasanen rate je ostal invalid, prez jene ruki, a delal je za ten va invalidsken udruženje va Zagrebe.