Andre Zvonov

Zad kućun Šantota Perca gre nazdolun kala. Na vrh te kali je mića kuća, kuhinja i kamara, doleka konoba, va koj je živel Andre Zvonov, barba Zvončićeven, s hćerun Pepinun. Andre Marot, tako se je pisal, je bil jedini Kastavac ki ni znal čitat ni pisat. Zgleda da je po arte bil zidar, aš je povedal da je delal va Mostare i po Bosnoj kad je ti kraji  okupirala Austrija 1878. leta i kašneje, pa je spominjal i Banjaluku. Putovalo se za delon va to vreme hodeć i s teh puti je Andre imel ča povedat. Sigurno su zidari va to vreme zidali po Bosnoj kazarmi za vojsku i žandarmi, to je Austrije bilo najprej potrebno, ma je Andre povedal da je delal i ˝Turkon˝, tako j´zval Bošnjaki. Je povedal da kad paron, ki pogodi neč zidat, pa kad se posal fini i plati onda reče: ˝Hajdemo u kafanu da te častim˝, i gredu, a ono vela čast – naruči i popije s tobun jeno črno kafe. To da j´bil zidar bi se reklo po ten aš je vavek spominjal nekakovu boršu va koj je nosil žlicu za žbokat i flajbu, va njoj je nosil stomanju i par kalcet i tabak. Tabak va torbe?! – ja, ma tako je i bilo aš je Andre tabak ćikal, a to su bile pera od tabaka sprešane va manji paketići, posebno pripravno samo za ćikat. Ča će to reć ćikat? Oni, kemu se to pijažalo, je od paketa tabaka, sprešanega dobro, odlomil jedan kus koliko za stavit v usta, pa je to prejidal i prehićeval po usten, to mu je delalo gušt, mu se j´jako i pljuvalo, ma ki su ćikali su raji skroz zubi drizgali.

Treba neč povedet kako je zgledala ta kuća. Je bila posensega starinska, takove ni bilo va Grade. Kad se j´oprl portun se j´prišlo va mićahan prihod pa onda otpret portijeri za prit va kuhinju. Va kuhinje pametin ognjišće i starinsku napu, va kantune se je videlo vrata za poć va kondot, mićahan da si se komać va njen mogal obrnut. Va kuhinje su imeli veltrinu, pul zida stol i tri kantridi. Okol ognjišća je bilo nekoliko tronožić za sedet i teplit se, a oganj se nakladal z prašćen i bi se stavil ki cok da drži oganj.  Za potaknut oganj je tu bila puhalnica, a za razgrnut ga železni popečak. Od zgora, nekade z onega širokega dimnjaka su visele virugi, na ke bi se obesil kotal za ča skuhat, najveć za palentu. Za kruh peć je bila črepnja nagnjena va stran ognjišća, za sen ten ča va ten nisu kruh pekli. Jedina poneštra na kuhinje je gledala na Halubje, i isto tako i mića poneštrica na kondote. Na mape okolo je bila kod polica na koj su bile kikarice i dve bukaletice va štive, a nad ten je bila uska koltrinica, da lepše zgleda. Va kamaru se j´šlo kad si oprl portijeru. Tu su bile dve posteji i boro, a kod armar su koristili udubinu va zide na koj je visela koltrina od zgora do poda. Jedina poneštra je gledala va kalu, još boje reć va zid od kuće nasuprot, tako da sunce ni nikada ni namignulo va tu kamaru, vavek je bilo va njoj napol škuro kod rano jutro al prednoć h večeru. Će reć neki kako san se tako lepo zapametil?Mane su, kod otroka tako okol sedmega do desetega leta pejali spat h Andretu kad bi moji otac i mat šli po zabavah, al predstavi gledat, a su računali da to još ni za me. Ja san rad tamo šal aš je Andre umel lepo povedat i poučit. Pepinu su moji zeli sobun da bin ja imel kade spat pul Andreta, a ona bi spala doma pul nas na jenoj šušte. Tako su se oni zabavljali a ja san lepo pul Andreta spal. Ma kakovo spat! Ala, barba Andre, povedajte mi čagod! Bil san mu saki put prnesal i cigari za ćikat, aš ni bilo paketanega tabaka za ćiku, a on bi  vas blažen i srećan rekal: ¨Bog ti daj zdravje!¨. Pak bimo onda seli pul ognjišća, oganj je potiho gorel, lampu nismo važigevali – ča će nan – i bi Andre počel: “Minji moj, to ti je bilo zdavna …a tamo negde je živela dovica s trimi otroki. Bila j´sirota i ni imela njin dat ča jist, aš je bila vela glad va ten kraje.  Je šla po kućah čagod za pojist sprosit, ma nisu njoj ni oni, ken je prišla na vrata, imeli ča dat. Ča storit, te deca umret od gladi?! Nakraje ni imela kamo, lego je dece spekla kravje lajno i to njin dala jist. Tako ti j´to svojni bilo…” Onda bi Andre mučal, drizgal va oganj, prehićeval onu ćiku po usteh, stavil bi neč na oganj, kakov manji cok pak bi onda počel: ˝San hodil za delon po svete z dvemi frkalasi, pa smo se tako hodeć fanj strudili i olačneli, a nigde sela, nigde lokandi za ča pojist i pokle popit. Smo imeli šoldi, ma ča će ti šoldi kad ni kade ča kupit. Kad vidimo malo vastran od cesti mićihna kuća i ž nje se dimi. O ben, kade je dima tu je i oganj, kade je oganj tu je i ča pripravno za pojist. Pridemo tamo, porošćemo na vrata, pride vanka mlaja ženska z mićen otrokon na rukah. Njoj povedemo ča bimo oteli: da nan pripravi čagod za pojist pa ćemo njoj to platit. Ja, da njoj je muž va gore i da malo fali pa će nazad prit, a da bi nan mogla samo palentu skuhat, ne more nan polevaču storit aš da nima špeha, a ni mleka nima aš je muž pejal kravu va goru. Pa dobro, stori nan palentu! Kad je palenta bila gotova, ženska se kod neč spametila: ˝San pozabila, zgleda da iman va kamarice neč mleka.˝ i je šla z onen kotlićen palenti vanka nalet to mleko preko palenti. Ma je to neč mane bilo sumljivo”,govori Andre, ˝pa san šal za njun poskriveć špijat ča će ona va kamarice delat. Ona je tamo z svojeh sisić namuzla mleko  va onu palentu i prnesla nazad mane i mojen kumpanjonon. Oni, onako lašni, počeli su lakomo jist, ja nisan nikako mogal, ni tel. ˝Ča je, ča ne jiš ?˝ ˝Ne moren, neč me stisnulo va trbuhe, teško mi je kod da san se kamena najil. Ne moren, najijte se vi !˝

Andre ni klel ni proklinjal. Najviše ča bi rekal za neč dokazat je bilo: ˝Aj, po križ boga!˝Mane je, pul ognjišća, vadil kako treba živet. ˝Minji moj, kad budeš šal mej ljudi ne daj se pod nogi. Nikad! Je ljudi ki te ti dobro mislet, ma je vavek više oneh ki pomisle zlo. Si ki ti budu zlo misleli neka ti v rit nos zabodu! Mej ljudi moraš vavek drito hodit i š njimi skupa. Ki šemeta semo tamo zaleti se va kanal, ki neće z ljudi al ni h sebe, al pak ni za mej ljudi !˝ Tako mi je govoril Andre, kega su zvali Zvon, ni znal čitat ni pisat, on je čital život i pametil, ni mu trebalo zapiševat. I danas se ki put na njega spametin. I va svojen san se živote puno puti spametil njegoveh besed.Ta mi je Andre bil kod moj pravi nono, aš moj nono po oce, Zvanić Jurinac ni rad s manun se zabavjal da mi ča povede al da me potehta, vavek je bil nekako: kod da mu ni neč pravo. Nono pak po matere je umrl kad ja nisan bil ni rojen.

Pepina je pul nas va kuću prihajala pomoć mojoj matere robu prat i lužit, podi požulit, poneštri potrt, a još nan je i šila stomanje i šotobrage za oca i za me a i matere za njiju potrebu, pak h temu lancuni, intimeli, kušinelnice i ča drugo za na posteji. Tako je pul nas delala se dokle ni moja dobra mat 1934. leta umrla, od boli na jetre. Pokle je bila pregledačica na kunfine h Matujan.Andre je imel lepe lehi va grunte na Studenceh, va keh je bilo ruž, sakakove vrduri, jena vela smokva belica i nekoliko žukav, a pod njun vela škalnica za vodu.