Bondetovi

Na kraje, skroz lehi, pridemo do zadnje kući va zidinah a to su Bondetovi, stareja, starinska storena vela kuća i neč noveja, manja kuća poć zgorun malo kontra Brozovićeven. Va toj kuće doleka, uz graski zid je živela mat Marija s hćerami Gizelun i Lizun, Gizela ni bila oženjena, a Liza se još prej prvega rata oženila za prišlića Plavšića, je bil Slavonac al Sremac nisan sigur, ki je pokle va rate poginul. Ostala je malica Ivanka Plavšić, ka je finila va Grade za učiteljicu. Š njimi je živel i Gušte, slep, kemu je bil posal saki dan čuvat kravu da pase Zagradon, a po nedeje je pretiskal meh na organe va veloj crekve, Stanko Kunčarov ga je zval Gušte mehogaža. Je bil već stareji, a pretiskat meh je bilo štufno, posebe ako maša duže dura, pa bi ga prišal odmenit Maksić Golubov, ni bil baš zjuštan po ešere, ma za meh pritiskat je bil vredan.
Po starine ti Bondetovi su bili kovači, su imeli kovačiju va Turne, kade se pokle držal prah i fišketi za maškuli hitat i za minat na općinskeh deleh. Kašneje su storili kovačiju pod Lukovemi z dolnju stran puta. Mat i jena hćer Gizela su se pisale Babić, tako i slepi Gušte (August). Se okol kući je bil vrt z vrdurun i rožicami, a bilo je i dosta ruž, samo ni bil ki jako delat, dve ženske ča su mogle, a plaćat žurnadu ni bilo s kuda. Ma sejeno ni okol kuće niš bilo zapušćeno. Ivanka je bila prej ovega rata nekade okolo Sijerinske Banje, ako ni to Medvjeđa, al blizu. Smo se jedamput našli va Beograde, kad smo setembra šli na svoje mesta delat, s nami je bil i Marijan Danetov Brozović, ki je delal va dvore pul kraljice Marije kod škultor. Su me kumpanjali na vlak tu večer i od tad nisan nikad više videl Ivanku ni čul ča je bilo š njun. Je ovde va Srbije ostala, je šla na ku drugu stran, ne znan. Kad san za raton mogal doma prit je ni već bilo, je finila.