Brozovićevi

Sada bi poć po nekoliko skalini zdolun i zavit va kalu kade najprej pridu Brozovićevi. Oni pripadaju va Pelini, aš njin portun na tu stran gleda, ma su na početke štivi kuć ka fini z Rečanićevun kućun, pa kako smo i do sada šli po kućah kako gredu po štivah, to ćemo i ovdeka poć.

Pametin oca Alberta Brozovića, ki je bil učitelj va Grade, a bil je to prvi Grajan ki je 1879. leta finil za učitelja va Kopre v Istroj. Kod učitelj je delal na Bodulije, va Vrbnike dosta let, a otuda mu je bila i žena, doma je zgleda prišal kad je već bil va penžijone. Slabo ga pametin ma mi pride pred oči nizak, star čovek, prignjen, vas va črnen i s črnen klobukon na glave, va lice škur i košćat. Žena mu je bila Bodulka, ka je vavek sanjala da njoj sini budu fratri, a hćeri koludrice, za sen ten ča ni jako hodila va crekav, a bogomoljka baš ni bila. Je imela doma velega posla aš ih je bilo za nahranit sedan, ča hćeri ča sini. Hćer Marija je prva šla od domi va službu kod poštarica, ako se ne varan va Mrkopalj va Gorski Kotar i otuda bi retko prihajala doma.  Ljudevit je 1924. leta finil doma za učitelja, je delal va građanskoj škole a pokle je šal na VPŠ za muziku i delal je va Banjaluke, ne znan je se oženil. To je bil veli talent, ne ča je samo umel sost na nekoliko inštrumenti nego je bil i za organizirat orkestar, kakovega ni bilo blizu, a on je kod prvi violinista ta orkestar v  rukah držal.To se je najbolje čulo kad su va salone na Brde pripravili prikazat operu “Kovačev študent” na slovensken kantanju – ljudi su kod zabljeni poslušali ćeš kanat ćeš muziku. Marijan je, kako ja znan, bil carinar na granice pul Maribora a prihajal je doma na vakanci vavek noseć sobun jenu lepu, veću i dobru gitaru, na koj je on još boje prebiral s prsti i bilo ga je gušt poslušat na Fortice, po lete podnoć i kasno večer. Bil se pokle oženil za Anu Slocarovu, sestru Milka Osojnaka, pa su onda reje prihajali doma, a gitara se ni već čula da Marijan na Fortice prebira. Treti sin Božidar, za nas je bil Božo, je komać pobegal od fratri, hitil flajdu va kantun i va trećen razrede s manun šal va školu dokle nismo skupa i finili, 1933. leta. Bil je dobil službu negde okol Križevac, pokle i va samen ten grade, se je bil i oženil, ma se nismo nikada videli od kad je va službu šal. I on je bil jako muzikalan, ni bilo inštrumenta va ki ni umel sost, jedino ni priznaval tamburice, i to ne samo da bi z instrumenton sopal najjednostavneje, nego bi to on navadil do kraja. On je pak vavek držal va svojeh rukah orkestar školani va Učiteljskoj škole za sen ten ča je Stanko Kunčarov bil dirigent.

Hćeri Bertotove Anica i Zlatica su finile za učiteljice pa je Anica dobila prvo mesto Manjinac pul Minićeva ( prej rata Kraljevo selo ) a grasćice su govorile da j´šla va malinac. Za Zlaticu ne znan kade je službovala. Najmlaja Femica (Eufemija) je živela doma z materun kad su sva ostala braća šla ća po svete, dokle ni prišal mladić za nju, Dolfo Kukan od Jelušić (Rudolf Mavar) i su se oženili.

Matere se nisu realizirale njije želji i nijedno od dece ni postalo sluga Božji. Su neč od tega iskoristili Ljudevit i Božo aš su finili del gimnazije pul fratri i na njih račun, ča je pomoglo da drugen doma više ostane.

I va ovoj kuće kod i pul Zvončićeveh jedan je drugega rival: ˝Ala, navadi neč, treba živet!˝ pa oni ki bi finili i dobili službi su pomagali oneh ki su se školovali. Aš prit vanka s penžijonon učitelja Bertota se ni nikako moglo, posebe va vreme prvega rata, kada se poboga i gladovalo. Su povedali da je Božo rekal jedanput ocu: ˝Ča ste me storili kad mi ne daste jist!˝

S te se kući vavek čula muzika: neki od njih bi sopal na harmonije, kega je još otac Berto bil nabavil, ma najviše je zgleda ta instrument koristil Božo. Sini nisu bili z dobren glason za kantat ma su zato sve tri hćeri, ke su živele va Grade, bile duboki alti. Ako se za nijenu familiju ne more reć da je bila takova ma se za Brozovići s Pelin slobodno more reć da je to bila najmuzikalneja familija va Grade, va vreme o ken pišen.

Sada, kada ovo pišen, va toj kuće nijenega ni…