Burgerica

Pod kućun Andreta Zvona pride kuća na dva poda va koj je bivala Burgerica, tako su ju zvali, a i pisala se je Burger, skupa š njun je živel sin Eduard, ma su i njega zvali samo Burger. Bil je školan pul mojga oca va prven razrede 1902. leta kad je otac prvi put prišal va Grad delat, a pokle je prišlo vreme pa su skupa delali va škole. Edo, tako ga je mat zvala, je dosti vremena bil prez ženi, bil se j´jako  navadil posejevat po oštarijah, najviše pul Betota. Sedel bi a pred njen kvartin, paket španjolet i fuminanti i tako celo zapolne i va noć, samo se ni ostajalo na jenen kvartine. Kašneje mu je delal kumpaniju Tone Ćiković z Dolčića, učitelj, mane je va građanskoj škole vadil. Burgera smo jenega pusta, rano jutro, Paško brijač z Perasovega i ja, obadva malo nafumani, našli pul Betota, pa nan Mima namignula da ga pejamo doma. Je zajeno šal s nami ma ni mogal hodit. Ča š njen? Tu je, zad jenen skodon kontra Betotove kući pušćal Viko Turnarić, ki j´smeti mel po Grade, svoju karijolu, pa smo Burgera nekako spaketili va nju i pejali ga zdolun kontra Fortice, pa okol Lukoveh i spod Lokvini po Pelineh doma, do kućice zgora Bondetoveh kade je, već oženjen bival. Smo ga poseli na zid pred vrati, poroštali na vrata i brzo pobegli ća aš mu je žena, poštarica, bila oštra i rada zamerit, za sen ten ča smo njoj muža doma pripejali, baš pripejali –niš zato, ča je pripejal se va karijole.

Pokle je Burger z ženun bival va Rečanićevoj kuće do Ludvikove, a bil je sobun zel i mater. To pametin aš nas je njegova žena, zgleda da j´bila Slavonka al Sremica, jako lepo prijela i ponudila kad smo jeno leto pohajali po Grade i kantali na Tri kralji ono: Tri kralji jahahu… Jili smo nekakove  slašćice i pili dobro vino. Trebe neč spomenut, ča mi je povedal pokojni Tončić Božina: Burgerica je najprvo bila devica pul nekega protota, ki je delel palaci po Reke, zval se Burger. Kad mu je žena umrla se j´oženil z devicun i s tega je prišal vanka Eduard. Kad je pak njoj ta muž umrl je prišla kod devica z sinon va Grad bivat.

Va toj kuće je zdola vela butiga va koj je Valerija Pizinova neko vreme delala krpaturi.

Ni z ove kući i ni nikada va njoj bival ni va nju hodil, al mislin da ga treba spomenut, aš je pokle 1930. leta bil stalni kompanj Burgera, vavek si ih zapolne mogal videt va nekoj oštarije, kod petak i subotu. To je bil Tone (Ante) Ćiković z Dolčića, ki je postal učitelj 1914. leta, a Burger 1915. , obadva va škole va Dome. Ta je Tone prihajal h nan doma, pul Petrićeveh, za vreme okupacije 1918. – 1921. leta, je z mojen ocen neč ćakuleval, ocu je govoril ˝ti˝a ne vi kod ča smo ja i mat bili navajni čut. Va to vreme je delal kod učitelj, va Rečine, ka je va to vreme bila pod Hrvasku, a kunfin je bil na vrh Kopice. Kadgod je prišal prinašal je nekakove knjigi, neč je ocu daval a zimal je od njega nekakove knjigi, bi malo sedel pul nas i onda bi po noće šal doma va Dolčić, al pak hodeć va Rečinu. Visok, suhunjav, tiho je govoril, gotovo šapićal, potiho se je i smel.  Na glave je vavek nosil rašketu kod da je nekakov artižan. Zač je on to saki čas prihajal i odhajal, al h domi al h nan, morda još i kamo drugamo, se je videlo kad su ga jenu večer ćapali karabinjeri, pejali va kazarmu Koširovoj kuće i počeli ga spićevat. Pokle nekoliko dan nan je povedal da je na šufite te kući bil vezan za stabar a karabinjeri su ga tukli žilun po goloj škine, ma ni niš priznal: ne znan i ne znan… Pokaževal nan je kako mu je zgledala škina, se po njoj modre štriki, pa mu je moja mat preporučila ča da previje da bi mu to pasalo. Pokle tega je reje prihajal, se je bal da će ga opet ki kužat da prenaša propagandu kontra Italije – letki i knjigi. A on je to i delal ma niš ni otel priznat. Kašneje kad je bila SHS je finil negde, bi reć va Križevceh, za nastavnika ručnega rada, ča je onda počelo kod novitad va Građanskeh školah, pa je kod nastavnik zato i prišal va Grad. Ja i danaska pametin njegov nauk: kako kartun i hartu rezat, kako delat kolaži s sakakoven materijalon i kako se povezuju knjigi. I on i Burger su se puno zmišljevali da bi se treba oženit, ma se je Burger nakako otpravil va te vodi, a Tone je ostal stari mladić, počel je se više pit, postalo mu j´to stalna bol. I tako on i Burger stalni gosti pul Betota ne čuju se, ma zato gre, kvartin za kvartinon. Čul san da je Burger va zadnjen rate grdo finil, ča j´bilo s Toneton ne znan, ne verujen da je mogal poć po pute ken je Burger zašal i finil.