Burkušovi

Sad bin zapisat neč od dveh kuć ke su na samoj Crekvine, a to su Burkušovi i Marjanovičina kuća.
Burkušovi su imeli skod pred kućun, vavek pun rožic. Tu su živele dve sestri od keh je jena bila oženjena za Petra Juretića, tajnika općinskega, s ken je imela hćer Branku, ka je va Grade finila za učiteljicu. Prej tega je Branka z materun bivala va Rečanićevoj kuće ka se drži za kuću Ludvika butigera. Ta Juretić je zgleda bil z Gromišćini, al z Rečini. Za vreme okupacije od Talijani 1918. do 1921. leta se je nekako više držal z okupatoron pa su to ljudi zapametili i kad su Talijani šli ća, pametin da je na jenoj manifestacije z bakljadun po Grade, kad se prišlo do Rečanićeve kuće, skočil Milan Tancabel na skalin pred vrati i razbil staklo na portijerah, za sen ten ča je ta Juretić negde prej oslobođenja već bil umrl. To ča se j´storilo žene i malice hćere od već pokojnega čoveka ni bilo lepo – ja, ma se storilo. Pokle su se mat i hći preselile va kuću na Crekvine.
Ta Branka je prihajala h nan da bi njoj moj otac nekako pomogal za dobit službu. Mane se pijažala aš je bila tiha, smirena, razložno je govorila i se ni pritendala. Šla je bila pokle nekamo ća, siguro va službu, ma ne znan kamo.
Kad san kašneje prihajal o vakanceh doma san vijeval obedve Burkušove kako sede na skode mej rožicami, nisu nikada jako zihajale vanka, najviše su bile va kuće al okol kuće.