Carovičini

Carovičini pridu malo nutra, je pred vrati veći tarac, a pod kućun je volta za pasat va Pelini. Tu je živela dovica Marija Grbac z dvemi hćerami: Tekla i Sava. Kako su i od česa živele ne moren reć, su držale i školani na fite. Tekla se bila oženila za Franjota Frankinega (Srdoč), a Sava je neč zamišljevala da će ju zet sused Ljudevit Brozović, ki je već delal kod nastavnik. Mi smo bivali pul Dirakoveh pa se z naše, jene poneštri moglo videt kako Sava sako jutro prej osme uri čeka nagnjena na oprtu poneštru kad će Ljudevit pasat na delo, da bi se pogledali. Za ti moment se Sava i načinjala da ča boje zgleda, a bila je onako lepušna, bila j´mlada. Ja, ma od tega gledanja ni bilo niš!
Ljudevit je šal z Grada ća, Sava je ostala doma. Pokle je oženil Milko Peloza, sin od Toneta Pelozi, žandarma va penžijone ki j´svojemi, ženun i hćerun Almun bival pul Kumeta spod Kapelicun, pod velun crekvun. Kad se j´oženil je Milko bil graski pulicaj na Sušake, pa je uževal prihajat doma, h Carovičinen sada, na jenen velen motore i va monture. Ča storit: otac austrijski žandarma, sin sušaški pulicaj! Ni ni bil za drugo, aš ni imel ki zna ča školi, prej tega je pohajal po Grade i posejeval pul Svetka va brijačije, je sanjal da će poć va legiju stranaca va francuski del Afriki, pa je već napred računal i govoril kako će za revnost va toj službe dobit medalju legije časti. Kod da to Francuzi dele sakemu, ki prej zdigne ruku?!
Tel bin z jednun zgodun ilustrat tu simpatiju mej Savun i Ljudeviton (njega nismo zvali Ludvik). San već rekal da smo bivali pul Dirakoveh i od one poneštri s ke se lepo videlo na Carovičine poneštri. Ljudevit je bil neč prišal h mojmu ocu, bilo j´po lete pa smo bili na sale na koj je ta poneštra. Ni tel nikako sest nego se j´naslonil na tu poneštru ka j´bila oprta, aš je puhala bava od zgora s Halubja i ni bilo teplo. Je s nami ćakulal, tu smo bili otac, mat i ja, mane nisu jako abadali, ma san videl da se Ljudevit saki čas obrnja i gleda skroz poneštru zdolun, pa je to tako duralo jeno pol uri ča j´on z mojemi ćakulal i obrnjal se saki čas, i je pozdravil će poć ća. Ma kad se j´obrnul poć po skalineh doleka pa vanka je moja mat videla da su mu brageše na rite se raskinjene i da mu se vide bele šotobrage. ˝Jezusine, šjor Ljudevit, vrnite se nazad, ne hote vanka takov, te van se smet po pute?!˝- i ordinala mu je da suče brageše, pa je sedel va šotobragah dokle mu je moja mat to na rite nekako ćapala i zakrpala da more doma poć se presvuć. A ča j´bilo? Na daske od poneštri znutri je bil zabijen jedan čaval, samo je malo bil vanka ma dosta da se na njega raskinu brageše, ke su veramente bile i frole, a baš na ten meste je Ljudevit bil nagnjen pa kad se obrnjal čaval je saki put malo, po malo raskidal brageše na rite. Viš, ča je amor, ne oćutiš i kad ti čaval se zabada, još malo pa vrit!!!