ZVUČNI ZAPIS
FRANA BANICA – TRANSKRIPT
Sad bi poć zada Rudnarove kući spod jene volti, kade je vavek bilo bačav od ula al od petroja i sakakoveh kasuni, i se pride do kući z skodon, neznan čigova je bila, a va njoj je bivala Frana Banica i Matić (Tuhtan) Franin – su ga tako zvali, po arte zidar – se dokle se nisu negde 1929. leta preselili va Ćulićevu kuću, va koj smo mi, Brunotovi, živeli na drugen pode. Ki j´pokle njih prišal va tu kuću ne pametin.
Dodatak
Permanova kuća
Pred nekuliko vremena pročital san va novine da se je „u dvorištu kuće Gmajnički“ održal nekakov program. Po slike san vaje videl kade je to, tr san tamo nekuliko let za Belu Nedeju držal vino va Rudnarovoj konobe pul teti Cveti i pokojnega barbi Ivića. Pokojna teta Anica ka je va toj kuće bivala rada je smanun poćakulala, a ja šnjun još raji.
Pital san stari grajani ako znaju kade je kuća Gmajnički, si su se čudili, to ni va Kastve. Nijedan mi ni umel povedet, pak ja nebudi len šal san istraževat.
Anton Brozović (1741.-1814.) oženil se je okol 1770. leta za Luciju Perman (1740.-1820.) od Permani.
Kako je va grade va to vreme bilo desetak familij Brozović, neke su familije nadimki dobivali po nevestah. Tako su i njih po Lucije prozvali Permanovi.
Na starine je ustal sin Josip Brozović-Perman (1777.-1853.) ki se je oženil za Uršulu Mafsenza (r.1773.) ka je prišla z malo dajega. Šnjun je imel petoru decu: Marija (1801.), Lucija(1803.), Ivan-Martin(1806.),Katarina(1810.), Antonija(1813.).
Jedini sin Ivan(1806.-1885.) oženil se je 1829. leta za Mariju Brajan (1802.-1874.). Imeli su četiri sini, Josip (1831.-1852.), Frane (1834.), Ivan(1837.), Anton (1842.-1911.).
Najstareji Josip je mlad umrl, pa je doma ustal Frane (1834.-1904.) ki se je 1866. leta oženil za Josipu Marot (1842.-1919.) od Spinčić.
Oni su imeli petoru decu: dvojki Ernest i Benedikt (1867.-1867.), Francika(1868.), Josip(1879.-1907.), Romano(1883.-1884.)
Jedina hćer Francika oženila se je 1901. leta za Josipa Fabrizio i šla ća od domi. Otac Frane umrl je slep 1904. leta, a za njin 1907. leta i jedini sin Josip, od samo 28 let. Prezime Brozović i Permanova familija se je zatrla. Va kuće je ustala sama mama Pepa. Prišla ju je dogledat neputa Marija Marot (r.1888.) Stepanova od Spinčić. Marija se je 1918. leta oženila za Franeta Tuhtana (r.1888.) od Jurčić.
Frane i Marija Tuhtan su imeli troju decu: Marija (1920.), Marijan (1922.-1923.) i Ruža(1924.)
Familija Tuhtan se je mej dva rata preselila va Zagreb. Kuća je ustala prazna pa se je čuda let afitevala. Negde do 1929. leta va njoj su bivali Frana banica i Matić Tuhtan od Škrlji, a za njimi i drugi stanari ki nisu imeli svojga krova. Za drugen svetsken raton va kuće su bili judi z vanjšćini ken su kuće bile popaljene dokle obnova ni njihe popravila.
Gospodarova hćer Marija se je 1941. leta oženila va Zagrebe za Miroslava Gmajnički pa je reditala kuću pokle smrti starejeh. Familija Gmajnički ni nikada va toj kuće bivala.
Od Rolihoveh kade su do onda bivali preselili su se va tu kuću negde pedeseteh let teta Anica Brnčić Martićeva (1912.-2006.) z mužen Jerkoton Baćić Vicićeven (1912.-1971.). Oni su va kuće bivali jako čuda let z svojun trojun decun. Deca su se poženila, muž je umrl i teta Anica je ustala sama. Skrbno je živela, pobirala drva po Loze, delala kakovu tuju lešicu, rada je hodila i dočekala velu starost. Pokle njije smrti vlasniki, familija Gmajnički je kuću prodala gradu Kastvu.
Stari grajani nisu ni znali ki je gospodar kuće lego su je znali po stanareh ki su va njoj bivali.
Kad su pročitali va medijeh da se neki program održava „u dvorištu kuće Gmajnički“ nisu mogli ni pomislet da je to jušto na Permanoven tnale zad Rudnarovun kućun kade je sa Isusova leta bivala Anica Martićeva.
Arsen Jardas
FOTOGRAFIJE
