Homatovi i Buzdon

Sad pul te kući pride jedan pasaj za poć zdolun va Pelini. Z druge strani pasaja su Homatovi. Va kuće je od tega roda živela samo Vicenca na pode, a na drugen su živeli Francik (Franjo) Buzdon Pizin i njegova parona, dve hćeri Marija i Valerija i sin Marijan. Franc je po arte bil postolar, a svoji mladi dni je bil i muzikant va poznatoj kastavskoj muzike, ka je bila poznata po Liburnije i sakuda su je pozivali sost na proslavi i na zabavi. Hći Valerija je za njega rekla: “Nikad ni niš delal, a vavek je dobro živel.” Samo se je po raškete poznavalo da je bil artižan, a saki dan po lepen vremene je sedel pred Ćulićevun kućun na zice, sedel celo prejpolne, pušil ako je imel ča al  bi mu ki dal, ćakulal ako j´bilo s ken al pak sedel sam. Valerija je umela delat krpaturi i zgleda od tega živela a i doma davala, Marija je bila odgojiteljica va Ilandže va Banate, pokle va Alibunare i je prihajala za vakanci doma, prihajala je i h nan i se hvalila da njoj je dobro – pa bi se moglo reć da su obedve nastojale pomoć bratu Marjanu da postane učitelj a kašneje nastavnik ki je vadil dečinu va  građanskoj škole. Ja ga pametin kad je kod prosvetar ˝Sokola˝ bil režiser dramske grupe pa smo ˝Sumnjivo lice˝ prikazali va Dome i va Diračje, i ˝Povratak˝ od Srđana Tucića va Dome. Umel je s nami mlajemi kad je rabilo ovako ča za predstavljat pripravit pa je gušta bilo š njen delat, aš je vavek lepo i taktički s nami umel da nisi mogal reć: neću!

Se j´bil oženil z Maricun Grosmanovun, učiteljicun, pa su imeli dve malice, a bivali su pul Dukić, na pode zgora obedveh Em, kade j´raneje bival Ante Mučalo, profesor, z svojemi. Marijan je pokle finil Višu pedagošku školu va Beograde i je fanj let delal va građanskoj škole na Lokvine.

Francik je ki put užal čagod interesantnega povedet: O neken puste su se zvončari jako rivali, preveć leg ča j´to bila užanca, pa se jedan od njih rovinal i od tega je umrl. Pred smrt je rekal svojen da mu na grobe sopu muzikanti z Grada, ma ni rekal ča treba sost. Su ga lepo zakopali va sv. Lucije i na kraje su graski muzikanti zasopli za Francikon, ki je prvi počel va klarinet, i to ˝Carneval di Venezia˝, jako veselu melodiju koj i ime govori da je bila pripravna za pust.