Marija Šporka

Na kraje ove štivi, ka počne od Andreta Zvona, pride manja, va mojo vreme ko opisujen, skoro napušćena kuća, va ku su z vremena na vreme prihajali Marija Šporka z manjen sinon Milanićen, al pak stareji sin Frane, ki ni baš bil preveć razuman, ma dobar za delo kod manaval. Skuda su oni prihajali, kamo su odhajali, ni se nikad znalo – a Milanić, s ken smo se mi, dečina, jako radi igrali, nikad ni niš povedal. Bil je siromah vavek bos, bragešice na jedan tiranat, kolena i na rite raskinjeno, nosil je nekakovu stomanjicu, jedan rukav se bil pol otkinul, a zgleda da se je jako retko umival al pak cel dobro opral. Ja, ma j´umel najboje plazit po maruneh na Crekvine, dobro je hital kamene, je znal sakakove igri a neč je i sam zmišljeval da je bilo velo zadovoljstvo š njen skupa pasat zapolne. Mat njegova, ku su samo tako kod Šporka zvali i znali va Grade, je vavek hodila kod nekakova pekljarica. Facol na glave vezan pod bradu, vavek sa va črnen i se je neč okol brhan viselo i lepetalo okol nje. Frane je bil već stareji, je povedal da je služil vojsku va Zavijačare (Zaječar) i da mu je tamo vas posal bil ča j´čuval i hranil prasci va ekonomije puka. Zgleda da su i tamo videli da ni za ča drugo. Kad san narasal, fantina i pokle mladić, ni se više vijevalo  nijenega od teh Šporkineh, a kuća je bila zaprta.