Marija Tepeš / Jure Đuro đurđević

Treba se sad vrnut h Burkušoven za finit zapiševat, ča rabi zapisat, za štivu ka počne s kućun, ku je za dotu dal Božina svojen hćeran, ke j´imel z ženun z Rošotove familije. To je noveja kuća na dva poda, al nekako uska a visoka. Po strane je do gorepoć fanj skalini z lepun farijadun, neč modernejun neg ča su starinske farijadi po Grade. Na prven pode je bivala Marija, udovica Oskara Tepeša, ki j´prej prvega rata bil općinski ometra i vadil je va ˝Istarskoj vile˝ tamburat, a zgleda da je va rate finil. Njije hćeri Julijana ( zvali su je Slavica) i Zdravka su finile za učiteljice i služile va Vojvodine, kade se j´Julijana i oženila, a sada je va penžijone i žive va Beograde, a mlaja Zdravka se ni oženila. Mat Marija je doživela veliku starost.
Na drugen pode su bivali: Jure (Đuro) Đurđević, brijač po arte z ženun Klementinun, a imeli su sina Vukašina. Kad su po Grade čule Grašćice, ke bi rade se znat, kakovo su ime dali otroku, nisu dobro ni čule, pa su jena drugoj povedale: ˝Ava mane, su mu dali ime kod da bi medvedu sin. Siroto otroče!˝ – Jure je bil Sremac, iz sela Čortanovaca, a prišal je prej rata va Grad i oprl brijačiju va fonde va Šćitarovoj kuće i to je let i let bila prva i jedina brijačija va Grade. Komać neč za 1930. leton je oprl brijačiju Svetko Kancijanić va Slocarovoj kuće i tu smo se mi mlaji vavek zbirali. Stareji su i daje ostali verni Juretu, pul kega su kod hlapci delali školani mojga oca, Vazmoslav Puž i Pepić Zorzak, a Jure je samo bril ljudi od položaja kod ča su bili duhtor Dabović, glavar Cucančić, zubar Hofman i drugeh takoveh.
Vukašina su tako navadili va kuće, najviše sakako mat da bude sam za se, se samo mane a drugemu niš ne dat, čuvat za se a drugemu kako je je. Smo jedamput šli ja, on i Zdravko Rolih hodeć preko gor s ten da po Slovenije pridemo do Ljubljani, a pokle nazad do Delnic pa z vlakon do Sušaka. Prvi put kada smo seli jist Vuko je sel pet, šest koraki daje samo da nan ne bi ča od svojga ponudil za jist, a ja i Zdravko smo podelili ča j´ki sobun prnesal. Tako je bilo i drugi i treti dan, a pokle smo mu rekli da mi s takoven va društve ne moremo puno puta storit, pa je on z Čabra šal sam za Delnice. Finil je za učitalja i služil po Banate, va Perleze i Bačken Gradište, kade se je i oženil z jenun Mađaricun. Ni š njun dobro živel, se je to bilo kod na silu, zgleda da ga je ona obrljušala, a pokle ga je vrtela kako je ona tela. Dece nisu imeli. Čul san da je grdo finil i prej vremena. Zdravka Tepešova mi je povedala da je svoj pod pustil hćere Slavičinoj ka sada žive va Sremčice blizu Beograda.