Šundrićevi

Sad pridu na red Šundrićevi.

Tu je vavek bila oštarija od starini ku je držal Ližijo (Vjekoslav) Jelušić Šundrić z ženun Marijun, a bilo j´dela dosta pa su držali i devicu . Oštarija je bila na pode, a kad je bilo više judi za popit i pojist ča, su uredili i veću kamaru na prven pode, kade je pokle bila čitaonica. Ližijo je bil svojni i poštar i kod takov, piše va knjigah, da je bil jedan od oneh ki su storili prvu hrvasku čitalnicu va Grade pod imenon ˝Složimo se˝ 1866. leta. Su imeli hćeri Ljudmilu i Mimicu (Mariju) ka je mlada umrla od galopirajuće jetiki, bila se j´prehladila na jenen tance i brzo za ten je šla. Ljudmila je z braton Dolfoton (Rudolf) dosta let, pokle smrti oca i materi, držala oštariju, dokle ni prišal va Grad moj pokojni otac, mu se j´zapijažala i su se oženili 6. Setembra 1906. leta. Tako piše z nutri na vere ku ja nosin, a ta vera mi je ostala od mojga oca Brunota i materi Mili, kako su Ljudmilu zvali. Drugi dva brata i to: Riko (Hinko) Jelušić kega su zvali i Ritina, i Francrle (Franjo) su finili za učitelji va Kopre v Istroj. Riko je finil zajeno z mojen ocen 1895. leta, a Francrle četire leta kašneje. Riko j´bil učitelj va Lanišće, v Istroj i studa mu je bila žena, a kašneje je prišal va Grad pa su on i Francrle delali z mojen ocen neko vreme va pučkoj škole va Kaštele, a pokle je Riko prešal va Delavsku školu i va njoj vadil se do penžijona. Francrle je delal va Sv. Mateje i va Lovrane, neč v Opatije i opet va Grade, dokle ga nisu Talijani pokle prvega rata internirali va Šardenju, kade je speć na betone navukal bol, pa kad se j´vrnul doma je boleval i brzo za ten umrl, morda negde 1922. leta. Bil je oženjen za Pepinu (Josipu) Lukovu a skun je imel dve hćeri, Mariju i Smiljku i sina Nandota (Ferdinanda). Najmlaji od braće Dolfo (Rudolf) Jelušić se j´bil oženil za ten ča se j´moja mat oženila za mojga oca i šla s kući ća na fit, i to z Marijun ka je bila od Brežac pa su skupa imeli dosta dece. Najstareji Zorko, pa pokle Lojzić (Vjekoslav), Vitomir pa Mira, pa ko leto pauza, a onda Marica, Božidar i najmlaji Dinko. Dolfo se j´z Marijun mučil održat oštariju i zgojit sedan dece, ma j´prišla vela pokleratna kriza i njegovu oštariju zadela, dugi su se delali i rasli, ma da je neko leto, okol 1925. leta bil Dolfo portijer na igračnice va Diračje z lepun plaćun i bilo je i manći od oneh ki su prihajali provat sreću na rulete pa bi dobili. S ten su se nekako pomogli, ma ni to moglo spasit ča j’bilo zgubljeno. Dobro da su se va teh jako teškeh leteh ziškolali i finili za učitelji Zorko, Vitomir i Mira, ča je finila Marica ne znan, a isto to ne znan za Božota i Dinkota. Lojzića su pak bili poslali va vojnu muzičku školu va Vršac i tamo je on finil za vojnega muzičara i bil je osiguran da će živet cel život va vojnoj nekoj muzike. Povedal je Zorko, sedeli smo na Fortice 1974. leta, da je maturiral i mat mu je otela z nečeren proslavit ta dan pa mu j’storila njoki s tenfanjen. Dokle je on obedval su drugi, brati i sestri morali poć vanka se igrat, aš ni bilo za seh od njok, ki su samo za njega bili pripravni. Trebe reć da je Dolfo bil jedan od najagilnejeg člani ˝Istarske vili˝, a 1911. leta i predsednik društva, kad je bilo za društvo i naj teže aš je pred vrati bil rat, pa je črno – žuta monarhija se više pritiskevala naši ljudi, da se ne bi preveć nadali va se ča su Srbi postigli va rate 1912. i 1913. leta. Onda su se držali koncerti i priredbi u korist Crjenega križa za pomoć ranjenen va rate tamo preko Drini i Savi, pa je i moj otac govoril na jenoj, takovoj priredbe va Diračje u ime društva ˝Istarske vili˝: da ne treba verovat ča obećuju Englezi i Francezi, ne treba verovat ni ruskemu cesaru da te našen ljuden prnest slobodu na pijate, nego se treba pripravit i bit ˝složni dočekat dani ki su pred nami i te neč novega prnest ˝. Je moral pasat još jedan rat ki je pol sveta rovinal, pa je komać tad prišlo ono ča se j´tolike leta čekalo: da naši ljudi moru slobodno hodit, govorit i delat, samo će za delat puno pokvarit kunfin kontra Italije, kemu se Kastavci nisu nadali da će onakov bit, kod ča je pokle još 22 leta sekal Kastavšćinu napol.
Puna kuća pa treba puno i pisat.
Zorko je šal va službu va Preko, z drugu stran Zadra, a pokle se j´prehitil nekamo okol Varaždina, pa va Varaždin, se to na dele kod učitelj. Va Varaždine se j´i oženil i paran da ima sina. Vitomir je bil dobil prvo mesto va Srbije okolo Aleksandrovca – Župa, pokle se j´premestil va Slavoniju, zapravo va Moslavinu kade se je va Kutine i oženil i ima sina Vatroslava, ki je stomatolog v Opatije. Za Miru ne znan kade je službovala. Maricu san trefil pokle rata a žive i oženjena je va Novskoj al va Slavonskoj Gradiške. Za seh drugeh, moji kujini, ne znan kade su službovali, ni kade su, samo znan za Lojzića da danas žive na Trsate, za Zorkota da je va Zagrebe, a Mira je živela doma pul Šundrićeveh do smrti 1977. leta. Doma je danaska Vitomir z drugun ženun Bosiljkun (Tijan) z Kostreni, a do smrti je z Vitomiron i Mirun živela i njiha teta Jenija (Eugenija), materina sestra, koj je kuću Šundrićeveh pustil njiji otac z Brežac, kad je platil dugi za tu istu kuću, storeni raneje. Ta je teta pustila kuću Vitomiru i Mire da bi ju prigledali do smrti, kako je i bilo.