Antičini

Zad crekvun sv. Šebaštijana su Antičini i Jurjeničini, pak za njimi Baničićevi i Maretini, to je kup kuć, jena se za drugu drži. Se su to kuće na pod, a Baničićevi imaju i kamaru na šufite.
Pul Antičineh je živel Tončić (Anton Dukić) z ženun Katarinun, braton Lojzoton (Vjekoslav), sini Sebaštijan i Frane i hćer Marija. Sebaštijan je negde s kraja onega rata umrl. Tončić je po arte bil zidar, to i njegov brat Lojzo, a pokle se je i sin Frane temu artu navadil. Napored s ten je Tončić bil let i let župan va Grade, aš je Grad z Brnini skupa bil jena županija. Zato su ga ljudi vavek zvali Tončić župan. On se vavek nahajal kade se neč za korist seh va Grade delalo, njegovo je bilo da ogase japno na Crekvine, skupa z braton i još s ken, za potrebi općini, da se va Loze, va komunsken, seču maji za Telovu i kad su na Crekvine bili koncerti, kad se odredi kadegod tlaka za popravit puti, i još ča. Zato Tončić ni nikada, kod si drugi artižani va Grade, nosil rašketu, vavek je nosil klobuk, se računal kod da je neč kod impjegat općinski. Lojzo je delal z braton. Nisu zimali veća dela, najviše su po Grade šli belit kući i kamari, Tončić bi pogodil a Lojzo bi delo storil i finil. Bi zeli i po kućeh čagod popravit, zrušeno nazidat, stare napi dole hitit i kuhinju preuredit, šterni va konobe kemu storit, dimnjak prezidat ako je molal i tako ča. Lojzo je još malo ostal stari mladić, ma se je već va leteh dobrahno, prizetil pul Trinajstić. Pokle je z ocen delal zidarski posli sin Frane. Š njen san bil dobar kumpanj, je bil ko leto od mane stareji, ma je znal kade su najboje praskvi, kod ča je Emile Zvaninov znal kade su zrele smokvi. Frane bi po nedeje užal zet od domi fišketi za minat pa smo to šli, duboko va Lozu, hitat. Skupa smo šli na Sušak va kino gledat film „Carev glasnik“, ja ma je Frane gledal film ma ga i neč drugo interesalo, smiron je gledal zgorun na štuk, malo, malo pa zgorun. Ča j’ to na štuke bilo? Mi je pokle špjegal da štuk na kine ni storen kako treba, ni lepo drito, već kod na vali, kod da ga nisu delali zidari.
Mat Kate i hćer Marija su delale grunat. Imeli su i kravu pa je Marija nosila mleko po Grade kemu rabi. Su imeli jako dobre lehi va Mišince i Marija je, kad je štajon, nosila punu kofu salati i druge vrduri v Opatiju na placu.
Si su va kuće bili jako vredni. Bil san mićehan kad san i pul njih videl ognjišće z velun napun, viruge i kotli, ma su to brzo za ten preuredili, napu hitili dole, i stavili va kuhinju šparhet. Još pametin da je vavek sedel pred vrati jedan nono z lepun bradun, spodobnu na onu ku j’ imel cesar Franc Jožef. To je bil Ližijo Dukuć Antičin, Tončiću barba, a spominje ga Ive Jardas va „Kastavštine“ da mu je ta Ližijo povedal štorije od Kastavac: od Crekvini, od kanula bazgovega i kako su Kastavci sadili sardelice. Kad san postal fantina nonota pred vrati pul Antičineh ni već bilo.
Antičini su imeli lepeh ruž va Goricah pod Gradon, bi reć i dobrega vina od teh ruž, ma nisi mogal nijenega od njih videt da ga je vino ćapalo.