Baničićevi

Pul Baničićeveh je lep prihod z ferijadun, a nad njen skod pred kamarun ka je bila više pod krov. Tu su živeli Pepić Dukić Baničić z ženun, hći Mila i sin Stanko. Za Milu je zapisano da je plela sake sorti pletenini, a Stanko je kod otac mu bil kovač. Pul njih je bilo va toj kamare z skodon i fitovali: ko leto školan Bodul ki se j’ zval Ivan Kavrečić, a pokle više vremena Vinko Perčić ki je va službeničkoj zadruge (Grajani su to zvali „konzum“) bil dosta let butiger. Bilo je za grašćice puno tega za povedat kad je jenu večer ta Vinko bil s pištoli hitil va Svetkota brijača, ni ga rovinal i ni to otel storit, a h temu je pištola bila mićihnega kalibra, ali bili su obadva i još neki š njimi malo nakramani pa nisu pazili ča delaju i ča bi moglo s tega vanka prit. No je se dobro pasalo.