Carovi

Tu spod Filetoveh pridu Carovi, zapravo Carovice, obadve dovice, sestri Marija i Jenija (Eugenija), obedven su muži finili va prven rate. Milčić je bil prišlić, Slavonac al Sremac, pustil je doma sina Miroslava, šal va rat i tamo finil. Jenijin muž je po nacije bil Čeh, se je pisal Krist, je šal i on va prvi rat, pustil je doma sina Dušana, je bil crveni gardist va ruskoj revolucije i tamo je negde stradal. Tako je Jenije povedal Mate Demarin, profesor ki se s tuda vrnul semo doma.
Od oveh dveh sestar je saka imela svoju kućicu. Marija, Mirotova mat se je pokle oženila za Nikolu Žica, impjegata na općine, s ken je rodila hćer Zvezdanu, ka danas doma, na starine žive z mužen Stevoton. Miro je proval poć va marinu, va podoficirsku školu, va bivšoj Jugovine, ma ga nisu prijeli aš je bil kratkovid. Kad je na sreze šal va penžijon neki Škalamera, ki je skupa z Lukežon delal su na njegovo mesto prijeli Mirota, pa je tu i ostal kod impjegat na sreze – mi smo ga kojonali da je policijski pisar.