Dve Emi

Z a tu Danetovu, al Grosmanovu, kuću se drži noveja kuća na jedan pod va koj su dole bivale dve Emi. Ema Štrkova sestra od Tončića Štrkovega, kujina mojoj matere, ka je delala na makine za štrikat sakakove pletenini, najviše kalceti, posebe pa one tanke za po lete nosit. Mane je bila kuma na krste pa mi je povedala kako su na botrinjah pili najboju belicu ka se j’ mogla nać pul Baćić, a i sega drugega je bilo kakovo ćeš. Su mi od teh botrinj ostali dva žmuja z nožicun, pa ću i ja danaska na 10. marča 1985. leta popit z jenega ma črnega vina, mane se više pijaža. Ni mi žal ča mi j’ pasalo 71 leto, žal mi je samo ča je puno mojeh kumpanji šlo, ostal san, ma sam.
Ta moja kuma Ema je rada škrcala i je vavek bila pronta kakovu dobru, smešnu štoriju povedet. O puste se, već i va leteh, rada maškarala, pa bi za škerc na tance ćapala Ludvika butigera i š njen tancala, dokle se on ne bi vas zapuhal. Bila je mej prvemi ženskemi z Grada ke je Tepeš vadil sost va tamburice, skupa z Milkun Stipkovićevun i Emun Grosmanovun – ih je videt na slike z 1904. leta pred sv. Trojicun (prilog „Spomenici“).
Ema Grosmanova je više bila doma, spravjala po kuće i kuhala. Su držale kozi va skadnje kontra Gauševen i s ten se malo pomagale.
Na pode je bival dosti let Ante Mučalo, profesor, rodon z Vrlike va Dalmacije, z ženun ku su opet grašćice zvale Mučalinka, hćer je bila Nada i stareji sin Vitomir, kega su doma zvali Vitko, pa tako i mi, njegovi vršnjaki. Mučalo je predaval kemiju i fiziku, samo se jako bal storit kakov eksperiment, to je bilo za njega kod skočit va šternu. Rad tega smo pul njega to više vadili z knjig. Njegovemu pak sinu iman zahvalit ča me je navadil grdoj navade: pušit. „Na ti pol, provaj malo, neće ti bit niš!“ i tako od trinajstega leta do danas, ne preveć, deset al ku više cigaretu na dan, ma se ne moren odnavadit.
Ti Mučalovi su šli, kad se Učiteljska škola zaprla, bi reć na Sušak, a Vitko je nekako finil gimnaziju va Ljubljane. Ča je potle š njimi bilo ni mi poznato.
Va taj stan na pode su se pokle uselili Marijan i Marica Buzdon, od Pizinoveh, kade su živeli z dvemi malicami: Vlasta i Sonja.