Filetova kovačija

Na drugu stran puta je kovačija va koj delo nikad ne prestaje. File je bil čovek maleh besed, i doma i va kovačije i kad pride va društvo. Tako se i va kovačije poštoval kod paron: si delaju, hlapci ča limaju, lavoranti juštaju, Ive neč vrta na makine za vrtat, File obrnja va ognje šinu za kolo. Neč tiho reče i već su pripravni Milovan i Ive z velemi bati, File stavi šinu na nakovalo i počnu kovat da se iskri lete po kovačije. Čuje se kako tuču dva vela bata, a manji, va ruke starega Fileta ki tuče i porošćuje po nakovale – to je komanda kako treba tuć i po onen ča se kove. Va toj kovačije, kade se čulo samo kako se dela, bi se ki put čulo kako Milovan fiče: „Ala si mi fin, ala si mi fin, ala si mi fina fićuka…“ i kako fiče po takte lima.
Bilo je ča videt Fileta, kad bi se spotil od dela, bi stal pred vrata kovačije, onako krupan, visok, va lice škur, oče su mu vavek žmirile i kad je gledal va oganj i kad ni – i tu bi se malo ohladil, a i odpočinul. Pak za ten opet na delo. Kovačija je samo po nedeje bila zaprta, a ta dan prej polna za velun mašun je File prodaval pod marunon pred Diračićevemi koserice, sekiri, sekirice, rankoni i još čagod, a to su Kućani i Vanjšćaki kupovali, znali su da je storeno po regule i od artižana ki ne fali.