Frdulova kuća

Za Slocarovu se drži Frdulova kuća, uska i visoka, na dva poda. I tu su živeli Carlavarisi, to je starina Nandota i njegoveh sestar. Ima lepo storen portun kod i na Slocarovoj kuće. Skroz ta portun se šlo zada, va butigu va koj je prodaval Ivan Carlavaris – Frdula su ga po Grade zvali – lep star čovek z bradun kod cesar Franc Jožef. On je prodaval železariju: orude, šparheti, kosi, motiki i još čagod, a h temu i buli za ča je pisalo nad portunon: „Prodaja carskih i kraljevskih vriednota“, a po ten se jedino i znalo da je nutre butiga. Kad san prej par let bil doma san pul Mateta Turka, klesara, videl va kuhinje šparhet, na ken je pisalo „Ivan Carlavaris Kastav“, a ki je još vavek va upotrebe, ni nigde još zgorel, a zvani zgleda lepše nego takovi šparheti ki se danaska fabrikaju.
Znan da je jena sestra Nandotu bila oženjena za Arnešta Grosmana, druga h Zidarićeven, mat Lojzića i njegoveh sestar, a za druge ne znan. Nando je kod i otac njegov finil negde za trgovca i njega su stareji ljudi zvali Frdula, al Frdulov.
Treba spomenut za starega Frdulu da je va butige neč prodaval česa ni danas nigde nać. To su zvoni za zvončari, ki je on negde z Beča naručeval. Onda su se ti zvoni, ki se obese kravan za vrat da se čuju kuda pasu, merili na litri, pa je tako Frdula bil naručil teh zvoni, a da budu od 7 do 12 litar veliki. Prej neg ča su mu naručeno z Beča poslali su mu pisali da bi radi znat kakovo će blago ti zvoni nosit okol vrata.
Nando je imel brata Ninota, Ivana Carlavarisa, ki je bil učitelj po Vojvodine, retko je doma prihajal.