Kuća Dalice Drnjević

Na dolnju stran spod njih je svojni živela Dalica Drnjević z sinon ki se zval Miha, a zvali su ga Miho Daličin. To je prve leta pokle oslobođenja našega kraja bil najboji sokol va Grade, posebe mu je šlo delat z decun i pripravjat ih za nastupi. Za pripravit slet va Grade Mihota si mogal sakuda videt i čut. Ma ni puno let pasalo je šal na Hvar, al na Brač, pa je i tamo na istešen dele prišal na glas. Vaje, kad su Talijani šli ća je zmislel bil pesmice: Šalaj, šalaj, pa šalaj
Talijan je z vragun šal,
Ča će one brižne male
Ke su š njimi spale…
Šalaj!
al pak ovistu:
Stara kola, nova ruda
Devojka hoće da se uda
Za kega?
Za kumisara!
pa su se te pesmi kantevale sakuda po Grade da su ih i deca navadila.