Kuća Nandota Karlavarisa

Nando je kupil kuću na kraj ove štivi, o koj pišen, je predelal, doleka storil velu butigu za železariju, ciment, sakakove pituri i kožu, sake sorti čavli i druge potrebi za artižani kastavski. Pod kućun je bil lep vrt, nekoliko leh jena pod drugun. Se je računalo da mu, kod trgovcu, va Grade pa i va Kastavšćine najboje gre. Zarad tega se ni pritendil, je ostal domaći čovek, a takov je bil od mladosti, jedan od prveh sokoli va Grade: on, Janko Slocar, Tone Mežnar, Ive od Brnin, Riko Jurinčić, Lojzo Antičin, Zvanić Jurjeničin i neč mlaji s njimi Otelo Valesiov. I kad mu je najboje šlo je saki mogal š njen pogovorit, za savet ga pitat, rad je va svojoj butige politikal a poslušali su ga Ive Brkotov, Mate Maretin i Dane postolar, ki put i Tone Mažnarov – pokle su to ča su tamo čuli širili dalje mej ljudi. S Tončićen Božinun je Nando mej prvemi pripejal va Grad Svetozara Pribićevića, lidera SDS, ki je prvi od političari za prven raton držal govor pod ložun. Nando je va Sokole let i let bil starešina, zač je bil, okol 1930. leta, sam predložil da ga zameni Marjan Tomašić, sreski načelnik, ki zna.
Doma je bila gospa Milka, Nando ju j’ zval Mamica i ča bi ona rekla, za Nandota je bil zakon. Milka je bila od Kudeji ma veće gospe va Grade va to vreme ni bilo. Hći Sonja je o vakanceh rada bila va našen društve, bila je vesela i simpatika, ma je vavek ahtala da ne zakasni na uru ku je mat rekla da more vane bit. Su ju bili poslali h koludrican va Gansendorf pul Beča, kade se je trebala navadit semu ča njoj, kod bogatoj, treba znat kad se oženi. Pokle se ni već s nami, mladići z Grada, družila, sigurno je mat zabranila.