Slocarovi

Pod Forticun je vela kuća: Slocarovi. To je kod palac na pod, a na stran Stražnice pride veli portun od železa za poć va veli kortil, na strane z velun šternun. Va kraje i nazidano na kuću su nekada bile štali za konji, a pred njimi pokriveno za vozi. Od portuna na levo pride kod kovačija, ma toliko koliko rabi kotlaron za finit kotli. Tu su štanjali kotli z nutri, tu je Mate Maretin koval manice za kotli i delal fornaži za rakijni kotli. Vas pak posal zikovat kotal i ča drugo od rama, se je delal na drugu stran portuna va većen prostore za delat nad ken je bil pod a tu je bil magazin za se ča se je od rama finilo delat.
Mat mi je povedala da je svojni, na početke ovega stoletja živel tu Janko Slocar, kotlar, ma je imel i konji i furmani ki su delali po Reke na porte, a i po Kastavšćine ako je kemu rabilo. Imel je brata Francika (Franjo) ki se je pokle od domi preselil va kuću, ku je storil pul Belić za tu opret oštariju. Mat je povedala da ju je ta Francik pital bi se za njega oženila pa da bude parona va toj novoj kuće i v oštarije – ma ga ni otela, njoj se više pijažal moj otac Bruno, pa magar š njen šla na fit po Grade. Francikova misal za opret oštariju ni bila prez potrebi, aš su po ceste pred vrati va to vreme pasevali puni vozi s konji zdolun v Reku, a z Reki zgorun va Trst i va Kranjsko, bi se tu frmevali furmani ča popit i pojist a konjen dat sena, da jeni i drugi počinu.
Sestra ten dven Olga se je oženila za Viceta (Vinko) Osojnaka z Osojnaki pod Učkun, ki je pul njijeh brat delal kod kotlar. Janko je umrl, ma se niš ni promenilo: ostali su Slocarovi i danas, kad Carlavarisi – kako su se pisali – va toj kuće ni. Stari teh Carlavarisi su prej dvesto i više let prišli va Grad z Furlanije, tu su i ostali poznati kod kotlari, a ono Slocar (od nemškega SCHLOSSER) ča bi reć bravar, neki je prvi tako rekal, tako je do danas i ostalo. Delo oca Viceta – ki je bil jako bolan – je produžil sin Milko, i on jako dobar i žvelt kotlar, ma danas zadnji od takoveh artižani s ken će i art kotlari i tradicija Slocaroveh finit. Sestra mu, stareja Ana se je oženila za Marijana Brozovićevega z Pelin i š njen živela va Maribore, kade je on bil carinar. Druga sestra Marija ni finila školi, je bila doma, se j’ okolo nje vrtel Manko Vicićev ma njoj se ni pijažal, bil je štufan. Treta, Nada se je oženila za Ivana Jelovicu, učitelja od Brnčić i su bili na službe negde po Hrvaskoj.
Pul Milkota mi je pasalo puno vakanac gledajuć kako se delaju kotli i ča drugo od rama. Va to vreme je Milko dobival gotove formi za veći i manji kotli, kod i za rakijni kotli i ono, kod bareti, zgora za zapret kotal, a to se delalo va Monfalcone blizu Trsta va Italije. Kilo tega „poluprodukta“ je bilo 90 dinari, a va Bore san kašneje doznal da je kilo rama nepredelanega koštalo 30 al 35 dinari. Se vidi s tega da je fabrika dva puta više zaslužila nego ča je ram guštal, to će reć zivuć laštri rama i pokle od njih storit nekakove formi kako kemu rabi, al kako ki naruči. Milko je povedal da se te formi, grezo storeno va fabrike, tako naruče kako j’ kemu potreba. Pokle je te formi Milko obdeleval z sake sorti batići na sakakoveh sorti nakoval. To se tako tuklo po rede, red po red z batićen, da ti senjali ki ostanu pridu za lepo videt, a ram postane žilav i dura, ma se mora pazit da sakuda ostane jednako debel, a da h temu kotal dobije svoju formu kako je to po arte trebalo storit. Posebe se pazilo kako trebe storit rakijni kotal da z njega poteče dobra rakija, da je zjuštan i da nigdere ne pušća, a kanel skroz ku se rakija hladi je bila poseban specijalitet za storit. Milko je zmislel bil rakijni kotal na dve kaneli, takov je novitad najprej na svojen kotle storil. Kad se pak kotli skuju z batići se va fužine teple i znutri štanjaju: stopi se va kotle štanj pa se z štupun razmaže sakuda znutri kade rabi. Onda Mate Maretin pride i od tondini skuje uše za manicu va keh će se obrnjat, pa to zabruka na saki kotal. Za rakijni kotli stori fornažu od debljega lamarina, va koj se sneti i nalaže oganj kad se rakija kuha. Kad se to se fini pride grdo delo: va velen kotle se zmeša ocat z vodun, va to se stavi kotal, a Mirko zame v ruku mac viružic, pa cel dan luštrat kotal zvani, dokle ne dobije lep kolor kod ča ram očišćen zgleda. Kad se osuši i ocedi – va magacin, pa kad budu podzime samnji va Kirije, pejat to na Sušak, pa na brod i tamo kade je samanj. Doma je Milko prodaval ča ki pride iskat, al ako ča ki posebe naruči.
Milko je rad pokazal od svojga arta, umel je dopovedet ako si ga ča pital. Navadil me je pilit železo, limat z limami, i najteže za me – brukat. „Brokun treba z batićen pejat, ne samo po njen tuć, kad se fini mora bit lepo, tondo z obeh stran…“. Kad san počel h njemu zahajat, skupa z Emilon Zvaninoven, su tu već bili kod domaći Dane Minje Ciline i Manko. Za Manka smo rekli zač, a Danetu se, zgleda, pijažala Nada, ja ma ča storit kad Dane ni imel oca, je ga imel i svojni je va ovoj kotlarije delal, ja ma za ondašnje vreme su takova deca bila kod zvani zakona.
Bimo Milkotu ki put i pomogli, kad je rabilo. On bi se strudil od dela, posebe po lete zapolne, rad je pušil, a kad se z ramon dela onda tabak pride sladak i ni gušta. Treba ruku oprat pak onda zapušit. Da se ne bi čulo da je batić frmal tuć, smo mi va kotlarije po čen je je tukli, va ritme i jako kod ča je to Milko tukal. Današnje „radno vreme“ ni onda bilo ni za sina, kemu je otac bil paron, delalo se dokle je videt. Kad je bilo većega dela, al se pripravit za kakov samanj, je prihajal pomoć Ive Gospodinov od Tometić, i on jako dobar artižan, a h temu je umel i puški popravjat.
Va Slocarovoj kuće je va butige na kantune bila za vreme prve okupacije od Talijani oficirska menaža, a va kuhinje se j’ pripravjalo za njih. Kad bi bila kakova njiha fešta su furišci od oficiri, ki su pul nas va Petrićevoj kuće bivali, prihajali prosit moju mater da njin da za poslužit ubrusi za stol i tavijoli, damaskani, aš smo imeli nekoliko garnitur. Mat njin je davala i vavek su lepo oprano i speglano vrnjevali.
Kad je prišla SHS su se va tu kuću naselili financeri, a va toj butige je bila trpezarija, kade su jili. Su bili zeli celu kuću, a kako mi se čini su se Slocarovi bili preselili h Dirakoven na pod. Kašneje je financeri prezel Tona Vlah od Trinajstić, ki je bil predelal salon i okol njega, a hćer Milena mu se j’ bila oženila za preglednika teh financeri, pa je i to pomoglo da su šli tamo. Milko je već bil mladić i su se vrnuli na starinu, kade je počel delat svoj art. Butigu je zel Bernard Pajalić, Bašćan, zet Kacinoveh, oženjen za Milu, pa je tu oprl butigu od manjativi.
Teh financeri je bilo dosta, aš je bilo potreba na saken prelaze na kunfine baren dva da paze i špjegaju kontrabandjeri, a dva žandarma su pak pazili da se ki ne prehiti prek kunfina ilegalno na pasajeh, graničari su pak patrolirali napored žice z naše strani, a ku su Talijani bili zdignuli, okol četiri metri visoko, kod jenu gajbu okol Kastavšćini od Rečini do na vrh Lozi, boje reć do Brezi, a od tuda i dalje je ni bilo.
Tako j’ to bilo kad san ja moral poć ća. Je to bilo kod jutra, 11. marča 1936. leta, kad san večer, skupa z Željkoton Grosmanon šal z Sušaka s cugon do Beograda i Niša, kade je Željko služil vojsku, a ja san šal pokle daje do mesta va ken san dobil službu.