Anica Klanjica

Smo prišli na Lokvinu. Treba najprej neč reć za kuću na dva poda va koj su vavek bivali kapelani, to će reć popi ki su pomogli plovanu va njegoven dele, va crekve i z  ljudi. Tu je živela Anica Klanjica, kako se j´pisala ne znan, ma su je pod ten imenon si poznavali aš je bila i vela bogomoljka. Tu je, povedali su stareji ljudi, bila nekada i plovanija, dokle se plovani nisu preselili va kuću do općinske kući, kade su i danaska. Anica je kuhala popu Juliju Laziću, Slavoncu iz Cernika pul Slavonskega Broda, ki je let i let bil va Grade kapelan, a po školah je dečinu vadil veronauku, pa tako i mane, i va toj je kuće let i let bival. Si su ga po Grade poznavali kod popa Lazića, slabo ga je ki znal po imene. Bil je dobar prijatelj z mojen ocen, pa bi ki put  z ocen i zakantali: “Širok Dunav, ravan Srem…” i još ku drugu slavonsku pesmu. Otac bi ki put i ča masneje zabrusil, a Lazić je bil liberalan pop, ne bi pobegal nego bi mu rekal: ˝ No, ti prasac jedan!˝ Mane je kod otroka otac rad zval tičić, a Laziću ni to nikako šlo za rukun reć, on me je zval: ˝ticič˝, pa tako i va škole.