Belčevi

Pride na red vela kuća na dva poda, šternun pred vrati, a nutre znad kortila Božinovega je bila vela veranda va stakle za robu sušit. Tu je živel Tone Belac (Anton Jurinac) z ženun Rešćicun koj ne pametin ime, četiri sini dve hćeri. Tone je bil temeljit, je ga bilo ča videt, maleh besed, jako štiman svojni va Grade i fanj premožan. Doma su ga toliko rešpetali da su ga žena i deca zvali “oni”, to bi reć kad bi kigod pital: ˝Je Tone doma?˝su odgovarali: ˝Ćaći ni, su šli nekamo, te prit pokle uri, al dveh…¨ – Tone je držal manufakturu – po nemški Herischterei – to će reć krojačiju za delat gornji deli za postoli, va koj su ženske na makinah za šit šile skrojeni kusi za gornji del postol ča su ga skrojili nekoliko muškeh ki su tu delali (herihteri). To se delalo va prizemujke dozidanoj od portuna Belčeve kući pa malomanj do Petrićeve kući, pokrivenoj z žingon i z lantami od lamarina na poneštrah, a z velemi poneštrami kontra Božinovemu kortilu, za boje videt kad se  dela. Alba, Tonetova sestra je bila druga žena tega Božini (Anton Rubeša) ki je držal oštariju. Krojilo se za postolari po Grade, po Vanjšćine, v Reke, Opatije i do Trsta, posla je bilo, kako su stareji povedali, jako puno i tako se do prvega rata. Onda je goveran frmal su prodaju koži, aš je najprej rabilo za potrebi rata, spod ruki je bilo rizik ča kupit i posal va krojačije je prestal. Tone j´računal počet posal nanovo kad fini rat, ma je prišla okupacija pod Talijani, ni bilo s čen ni ča počet, ni se znalo pod ken ćemo bit, se j´skupa počelo poć nazdolun i nikamo. Fiti na dug od prej rata su rasli, albokati su počeli  svoje zimat, kuća je intabulana… Se je moglo videt Toneta sedeć pul Betota v oštarije, pul kvartina, sam, mučeć i zamišljen, saki dan se huje i huje… Na kraje je Tone negde 1922. leta umrl. Od dece je doma bil Štefan, po arte kod mekanik, a sin Jerko je 1915. leta finil va Grade za učitelja, je delal negde va Zagrebe ma drugi posal, ne va škole. Retko je doma prihajal. Anči (Anka), stareja hćer je navadila v Opatije za modisticu, pa je ta art let i let delala, prihajajuć saku večer z Opatije doma, a z svojen zasluškon pomažuć doma da nekako dva brata i sestra čagod postanu. Josip je finil tri razredi za učitelja, je to pustil ća i šal za financera – to se onda boje plaćalo nego učiteljski posal, a sada je bilo lagje za oneh ki su još doma ostali. Marica je postala 1928. leta učiteljica, je dobila prvo mesto rudnik Bor va istočnoj Srbije, tamo je trefila Nedeljka Stefanovića, su se oženili, šli skupa va Salaš blizu Zaječara i na kraje va Ivanjicu s kuda je Nedeljko bil od domi. Marica je pozvala mater da pride h njin bivat, pa su tako sada ostali va Grade samo Anči i Dane, ki je već bil počel pul urara Jelušića na Sušake vadit art. Pred sam ov drugi rat se je Dane oženil z devicun duhtorovun od Bani, skupa su šli va Zagreb nać posal 1941. leta, prej neg ča san pobegal va Srbiju, san ih obašal, a kad je rat finil san ih našal zapisaneh na tombe va sv. Lucije.

Ča je, na kraje, bilo z Ankun ne znan, samo danaska va toj veloj Belčevoj kuće od Belčeveh ni nijenega…