Betotova oštarija

Kad se gre zgorun po pute pul Koširoveh se pride na drito. Na levu stran je kuća Benedikta Vlaha – Betota, va koj je bila njegova oštarija i va kuhinje njegova Mima. Beto je z konobi zinašal vino, bi saki put neč i sam popil va toj konobe pa je vavek bil al malo al jako pijan, bi zijal i ča zaklel, ma mu nisu zamerali oni ki su va oštarije sedeli, su mu znali tu njegovu viciju. Mima bi ga poslala raneje spat a ona je ostala va oštarije z ljudi. To je nekako bila gosposka oštarija, va koj su po lete sedeli na balkone, kontra moru, s kega je bila lepa višta zdolun. Pasat skroz konobu pa doleka je bil jog na ken su ta gospoda boćali. Na pode je pak let i let bival Jakov Jakac, ki je delal na Učiteljskoj škole, a kašneje je živel pul Betota i va penžijone va jenoj kamare z dvemi hćerami – bil je dovac – stareja Bogdana i mlaja Ljerka. Bogdana je hodila s manun va građansku školu va III razrede, ni njoj šlo pa je šla tete va Opatiju bivat. Ljerka je pak z ocen ostala va Grade i finila za učiteljicu, leto za manun.
Betotu su v oštariju prihajali Mate Šepić, zapolne ki kvartin popit, ki put, retko Ante Mučalo, Jakac je vavek bil tu ma j’ slabo pil, više je ča špjegeval i pod stari dnevi vadil grčki i latinski. Kašneje je prišal na red Burger i Tone Ćiković, Hofman zubar, pisar Ilija Kliska, bi zaletel i Tončić Zvončić kad bi doma prišal, a Pepino Zvončić je bil vavek za kumpaniju na boće z Hofmanon, i z impjegati z općini Paškvanon i Stipeton Crnkovićen. I oni stareji su va svoje vreme boćali, pokle su samo gledali kako mlaji boćaju. Kašneje, ponoće do kasna su tu igrali na „batić“ Hofman, Kliska i Ive Filetov, to će reć na karti ma va šoldi. Kliska je imel užancu igrat, pa bi najedanput stal i šal ća čekat s puškun lasice tamo negde h Pavletićen.
Ta Beto je imel lep, veli salon za tancat, pa su se tu držale zabavi dokle ni bil spražnjen Dom, kad se finil palac za Učiteljsku školu. Tu su va salon prihajali Vanjšćaki „zapit nevesticu“ – jena grda navada: kad bi umrla divojka bi njiji z kuće dali njijen tancuron i drugen tancurican šoldi, pa kad zakopaju i fine se va sv. Lucije, da je gredu zapit. Bi šli Betotu, hitili šolad va orkestron, ki je zaropotal, zaškripal i sopal nekakovu muziku ka se komać čula aš ta makina ni bila popravna ki zna kad, pa su zatancali kod da nisu prišli od sprogoda, muški su pili a žensken bi delili bonboni i su njin davali pit pašareti. To bi duralo uru, dve, dokle bi duralo ono beči, pa onda si skupa poć kantajuć doma, od kuda su prišli. Tu su navadu najviše držali Jurčići. Pametin Andrića Gržinu kad je va kažote pul Matića kupil dve kila svilneh bomboni za divojki ke su š njegovun kumpanijun prišle Betotu.
Tu su bile i lepe zabavi, maškarani tanci, ma se je raje za to šlo na Brdo, aš je tamo bila dobro storena pozornica, a pul Betota je to za saku priredbu trebalo delat, zdignut na kakoveh kavaletah.