Butiga pul Ludvika

Prišli smo do Ludvika Jelušića, do butigi ˝pul Ludvika˝. Tu je vavek, po lepen vremene sedela gospa Tilda (Matilda Škender) njegova sestra, na kantride pred vrati od butigi, i saken ki pasa čagod pogovorit, ˝ca je novega, s kuda greste, kamo greste˝ i tako se po rede.  Po dažjevnen i po zime je Tilda sedela va kantune zad glavnen bankon kontra vraton za poć va butigu, ni niš prodavala ma je zgleda bila kod nekakova kontrola ča lavorant dela. Lavorant je pak bil Milan Salković z Mošćenic, ki je se delo va butige držal aš paron od butigi, Ludvik, je slabo va butigu prihajal, neč malo prejpolna, al pak h večeru. Ni nikad prodaval, se je to delal Milan, a gospu Tildu je moral trpet, ma bi njoj ki put i ča prigovoril, ča je više pul njih va butige delal to je i više prigovaral. Aš na banke pred Tildun su vavek ležali baren dva maška, na isten  banke kade se pezalo i stavljalo va škartoci ča kemu rabi kupit, prodavali su uglavnon manjativu, ma je va butige bila i kartolerija, knjigi, pisanke, lapiši i pera za školani i tabak – se to kad prideš nutra na desnu stran. Neko vreme je Milanu pomagal jedan mladac z Kraja ki se j´vadil za lavoranta, on je kod i Tilda govoril na c. Kruh njin j´prineševal Bernardo Pajalić, zet pul Kacinoveh na Lokvine va Pelineh, kade je bila pehnjica. On ni nosil kruh sako jutro, to su delali oni ki su pul njega vadili za peka: Najprej jedan Bašćan  – Petar Cubranić aš je i on kod i drugi Bašćani govoril na c, pa pokle Lino ki je bil od Petrc, a pokle zet pul Vicićeveh za Elviru. Pul Ludvika su stavljali za butigu i kapuz kisat, negde zada va nekakoven magazine, pa su i to pozime prodavali. Kad je oneh mačak bilo va butige, kako je pak bilo zada va magazine, sigurno su maški bili rad pantigani. Kašneje, kad san ja već bil mladićac, se je to va butige malo uredilo aš je Milan siguro rekal da već ne more bit kod ča je nekada moglo bit. Bilo je va butige više reda, ma Tilda ni svoje mesto va kantune ni pred vrati mogla napustit, to je ostalo kod i prej.

Ludvik je bil stari mladić, zahvalit za to svojoj sestre koj se ni pijažalo da neka druga, mlaja, pride va kuću za gospodaricu. Više njoj se pijažalo da Ludvik po skriveć ima sina i pokle hćer, a materi te njegove dece su davale dece imena oca: Ludvik i Ludvika. S kun je imel sina neznan, ma je Ludvika (Ljudevita) hodila s manun va građansku školu, a mat njoj je bila Ilda Brozović, sestra Ivana Brozovića Žanetićini, općinskega fanta i oca Slavomiru i Ratimiru Brozovićen, ki su z materun Pepun bivali va škole, kad je otac umrl. Za ono vreme oboje dece se računalo kod mulci, tako se onda reklo za decu, storenu po skriveć i prez ženit se, pa bi ih to cel život kumpanjalo kod da su neč manje vredni od druge dece, ken su otac i mat bili oženjeni. Mat mi je moja povedala da nisu divojki rade tancevale z Ludvikon na tanceh, kad je bil mlaji i z Reki prihajal, kade se je vadil trgovine. To zato ča su se bale da bi ih mogal prevarit, pa pokle pustit kod Ildu i još jenu, ke su pul njih va kuće bile device. E, s tretun devicun, Ninun od Spinčić ni imel niš, je bil već  molal, ostarel za  avanturi, ma je zato Nina bila komandant va kuhinje i zvan butigi, kod ča je Milan se više držal konci va butige. Milan je počel davat i kredit va butige, posebno impjegaton za keh je bil siguran da te na kraj meseca platit ča su va ten mesece kupovali. Bil je storil napošne knjižice va ke se speža zapiševala kad se pride kupit, pa bi se to zbralo na kraj meseca i platilo. Tako su i moji doma kupovali, posebno va vreme kad ni moja mat mogla jako s kući hodit vanka, pa san ja jutro, al kad fini škola, tekal kupit ča rabi za ta dan. Prej tega, još dokle je mat bila zdraveja, je hodila kupit kade njoj se ča pijaža, pa san kod otrok š njun hodil na  Spinčićev Kal pul Pepini s Kala, kade su pekli jako dobar kruh a i drugo od manjativi smo tamo kupovali. Mat je rada prošetala kad je mogla.

Va vreme kad san bil mladić, Ludvik se još vavek držal da je va force, magar je bil već stari mladić, proval je i tancevat, ma su ga ženske prijimale više od komedije nego šerijo: su š njen po starinski tancale a prek ramena namigevale drugen, mlajen i šesnejen. Je ta Ludvik imel i starinski gramofon z velen rogon da bi se boje čulo, pa bi ga stavil na poneštru i pušćal starinske ploče ke su jako cijukavo sople, tamo neč od opere ˝Zrinski˝, pa z ˝Traviati˝i drugeh oper, ni bilo gušta poslušat. Imel je va magazine spod glavarove kući jenu lepu starinsku gitaru, cel mehanizam za žice je bil drven ča će reć da je i glas gitari bil mehak i zvučan, ma ni nan, mladićen tu gitaru tel dat da je regulamo za sost, ostala je viset va ten magazine. Je bil jako avar, ča se ne bi moglo reć za dečinu ku je z devicami imel, njih je pomagal.

Tilda je računala da je butiga i njija, a morda je i ona bila va njoj kompanjon, pa je rada i z butigi delila kemu je ona to otela storit dobrega. Ma kad je Milan više zel butigu v ruki ni već mogla jako regalevat.