Dorinini

Dorinini su susedi Carovičinen. Manja  kuća i uska ma dosta za mater Dorinu, dovicu Viceta (Vinko) Rubeša, Micinega, poznatega učitelja i pisca i agilnega društvenega delavca va Grade va svoje vreme i ki je prerano umrl va 41. lete 1908. leta, a za sobun pustil sina Nevenka i hćer Milojku, keh je mat s puno truda i slabun penzijun školovala, pa su finili za učitelji, a Milojka je pokle šla dalje na VPŠ finit za nastavnicu gimnastiki. Nevenko je služil najprej po Kordune, kašneje va Gorsken Kotare, kade se j´i oženil i imel je jeno dete, malicu, ku mu je pustila prerano umrla žena, pa ga pametin više kod dovca, aš je s tun ženun samo par puti prihajal doma. Milojka je delala gimnastiku z  ženskemi školankami od 1929. do 1938. leta va građanskoj škole, a pokle takov isti posal va Učiteljskoj škole se dokle je ova škola živela va Grade. Bila je i va ˝Sokole˝ istaknuta kod sposobna za pripravit lepe i složne vežbi z ženskami, članicami i z dečinun, podmlatkon. Vavek drita, visoka, lepo storena, odmereneh koraki, ukusno obučena, va govore odmerena a nikad ćakulona – se je puno njih okol nje vrtelo, ma ni ni jedan mogal reć da njoj se pijaža. Je puno puti prihajal h njin va kuću jedan duhtor z Beograda, se zval Milorad Dragić, s ken se upoznala dokle je bila na VPŠ, prihajal i bil pul njih doma nekoliko dan, grasćice su već delale sakakove kombinacije, ma ni ni od tega bilo niš. Zač, ne bin umel povedet, ki neč više od tega zna će i ovi amor podrobneje opisat. Ta je duhtor Dragić i danaska živ va Beograde, ima blizu 90 let, pa je prej neku šetimanu govoril na TV kako je on živel i delal da bi mogal takovu starost doživet, a osnovna misal je bila: vavek bit va mote!   Milojka je ostala va Grade – stara divojka.