Fabijo

Na Glavarovu kuću pride kod žontana manja kuća kontra Štrenjaroven, a va nju se j´moglo prit po dosta skalini od te strani, a skalini su bili i na drugu stran tega pasaja, po keh se prihajalo samo glavaroven. To je bila kuća Fabija, za kega mi je mat povedala da je bil općinski fanat i stalni gost va Šundrićevoj oštarije. Kako se je pisal, ne znan, ni kega je od familiji imel. Ta je kuća kašneje pripala Ludviku, trgovcu, za dugi ča su ih Fabijovi, al pak samo Fabijo, pul njega storili za manjativu, pa je Ludvik doleka prizemno držal neč kod magazin z skodon pred vrati. Se povedalo da je va ten magazine raneje bila neko vreme čitalnica. A goreka pak, va ravne z glavarovemi, sad boje reć glavaričinemi je živela od 1930. leta  pa napred mat i dve hćeri, dovica nekagovega impjegata z Novega va Kirije, a se zvala Matijević (ime ne znan). Hćeri su bile: Kazimira ka je s manun finila za učiteljicu i pokle se oženila za Milivoja Brozovića, a druga se zvala Marija, no su je zvali Mičica, ka je isto tako postala učiteljica 1935. leta, dve leta za starejun sestrun. Ova se pak oženila za Franju Francetića z Drenovi, ki je š njun školu finil. Mat i hćer su bile visoke, šesne i vavek uredne, ma se j´moglo oćutit da je matere teško prit z dvemi hćerami vanka a penžijon od pokojnega muža, ki ni bil ki zna kolik, ma ni to nijedna od njih nikada pokaževala, vavek su bile dobrega koraja.