Glavarova kuća

Stareji del Glavarove kuće gleda na glavnu kontradu na ku stran je storen i lep balkon, na ken je vavek bilo oleandri i sakakoveh rožic. Va kuću se prihajalo pasat pod voltu pa na desno po dosta skalini goreka i se je moglo poć va ovu kuću nutra. Bil je i drugi del glavarove kući ki je gledal na Lokvinu, je bil na dva poda i po ten, kako je bil storen i kako je zgledal zvani, se j´moglo reć da je bil noveji, aš je imel i drugačije poneštri. Zgleda da je bil na nekoj starine zdignjen još jedan pod, a to se moglo videt po konobe z jako debelemi zidi, va koj je Miro, kod glavar, imel svoju karocu a tu su bili i konji, samo su lepi dišenji na štuke te konobi pokaževali da je raneje ta prostor rabljen za tanci. Ja pametin da je va toj konobe držal seno, karocu i kalesin Zvanić (Ivan) Dukić Petrin muž, muž Petri Micine, sestri Viceta Rubeše Dorininega, a pred štalun, ma na Lokvine, je držal voz, aš je va si ti tri prevozi zapregeval konja Pubi-ja, zač mu kad rabilo. Kod deca smo komać čekali da nas gospa Tilda neč pošalje nest gospe glavarice, ku su tako i pokle zvali za ten ča njoj je umrl muž, i je na općine bil drugi glavar. Tamo, kad se pride nutra, va veloj sale je bil velik stol a na njen visoka i vela gajba va koj je bilo sake sorti tić, ki su kantali saki na svoj mod. S te se sali šlo skroz portijeri na balkon, a tu je vavek negde ležal veli, kosmat, žutkast pas, ki se j´zval Balkan. Bil je već star kod i njegova parona, pa j´pušćal da ga gladimo, žmiril je i mu se to pijažalo. Mi smo rasli a on je starel i tako je od starosti i finil. Je hodil vanka za paronun ma se slabeje i slabeje, pokle je do finjetka doma ležal i spal.