Kuća Jovanina Tajčini

Na Lokvine ostane još čagod napisat od kući va koj je živel Jovanin (Ivan Rubeša) Tajčina, brat od Petri Micine, ma ga nisu zvali Micin, nego vavek Tajčina. Š njen je va kuće živela hći Juština, ka ga je prigledala do smrti. Kad je umrl ne pametin, ma kod otrok i fantina pametin da je već bil jako star, ni mogal već delat kod tišljar, ča j´po arte bil, nego bi sedel na skalineh pred vrati i bi neč z britvicun rezal, je mučal dokle smo se okol njega igrali i potekovali, pa kad bi se našega šaraja štufal bi neč po nemški zazijal, a mi bimo brzo pobegli po skalineh na Lokvinu. Tajčina je imel i sina, opet Jovanina (Ivan Rubeša), su ga zvali Jovanin Tajčinov, ma ni živel z ocen, nego j´bil bidel (podvornik) va Nautike va Bakre, ki j´posal dobil aš je kod invalid prišal doma z prvega rata – bil je prez jenega oka. Rad san se igral z njegoven sinon Milićen, s ken smo se skrivali po tišljarije – od portuna poć nutra pa na levo, ka je bila puna struga, ki zna od koliko let, po poneštrah se puno paučini, a po sen ten skupa je bilo se posrano od kokoš, ke je tu držala Juština. Ni ona ni jako marila da se to očisti, a Jovaninu je se to skupa bilo sejeno. Bilo je va toj tišljarije četiri al pet banki i još puno oruđa, sakuda rashitano – ča će reć da je svojni bilo puno dela i za Jovanina i za nekoliko lavoranti i garzuni (tako je on govoril za oneh ki su vadili art), tako je i bilo. Jovanin je povedal, kad bi bil dobre volji, da je kod mladić hodeć po Nemšken navadil se ono ča je kod artižan znal.

Va vreme, kad je on mogal delat, su ga štimali kod najbojega tišljara, ne samo va Grade, nego za celu Kastavšćinu. Posebno za to ča je umel zmešat sakakovi preparati za luštrat mobiliju, a h temu je umel i rezbarit nogi za kantridi i stoli, klupi za crekvi i sakakove druge dekoracije, ča je va njegovo vreme bilo moda da mobilija ča lepše zgleda. Povedal je kako je to bilo po Nemškoj: bi prišal va neki grad tamo i bi va oštarije sel na banak nad ken je visel snop struga. Tu je čekal da pride artižan kemu rabi lavorant, bi š njen pogovoril, bi se pogodili za plaću na mesec i koliko će durat prova,  da paron artižan vidi ča Jovanin zna, a bi novemu paronu pokazal i karti va keh je pisalo kakov je bil pul parona prej tega. Tako je  pul jenega navadil ovo, pul drugega ono, kade mu je bilo dobro je bil duže vreme – i tako nekoliko let. Ni čudo ča su ga doma zvali Tajčina – moral je navadit po nemški govorit, pa kad se je doma pohvalil da govori ˝Deutsche Sprache˝ su mu Grajani prižontali ono Tajčina i to mu je do kraja ostalo. Kako je bil dobar artižan, tako je bil dobar i za sakakovu komediju zmislet i storit, pa mi je mat moja povedala sakakoveh škerci ča ih je Jovanin umel zmislet i storit. Pametin: za jedan pust je zrezal od mehkega dreva kvadratići, umočil ih va kolu, a drugi pak va kolu i va pilotinu od trdega dreva, i to je na tance prodaval kod ˝cukardorzo˝ karamele. Ki su kupovali i provali ti “bomboni” su mučali, nisu teli priznat da ih je Jovanin prevaril, da bi se i drugi prevarili i to kupovali. Poznat je bil i po ten ča ni nikada imel cinturin na bragešah, nego su mu bile vezane z jenen špažićen – i ja ta del njegove garderobi pametin. Rad je i ćikal a ni pazil, kad drizne kega će z onun kafe – slinun potrefit. Još mi je mat povedala: su prišli jenu večer z Voloskega žandarmi obać Grad i raspitat se je kakoveh novitadi, da ne gre čagod nopak. Onda su se ljudi jako bali od žandarmi – a imeli su i zač, ne daj ti bog prit va njihe ruki. Z neken inpjegaton z općini su seli pul  Šundrićeveh posebe va kamaru pul kuhinji, zaprli vrata da ih puste na mire. Ma Tajčina je tel doznat ča to oni po nemški štroncaju, da ni čagod ča ni dobro za kega z Grada, pa se j´potiho primaknul vraton, ka nisu jušto zapirala kod va sakoj oštarije, i počel poslušat. Neki ga je od njegove kompanije dobro rinul, Jovanin je zaletel nutra va kamaru pred oni žandarmi, va ten mu j´špažić na bragešah puknul i brageše su pale doleka. Ča storit? Žandarmi su ta hip skočili, ma nisu znali ča storit s ten čovekon ki j´h njin zaletel i va šotobragah pred njimi stoji. Oni impjegat njin je protumačil da ta čovek ča pred njimi stoji ni baš posensega na ešere, da mu ne zamere, da je malo na venti un. I tako je Jovanina škapulalo, a moglo je drugačeje bit. Zarad onega špažića ki j´va nevreme puknul, Jovanin se škapulal, da tega ni bilo bi ga žandarmi pejali sobun i va pržun.