Školi

Z drugu stran ove kući na Lokvine, od ke san do sada neč zapisal, su bile školi. Trebe za njih neč reć. Va nekadašnjen kaštele je bila od 1881. leta pučka škola, ma za muškeh, i to va staren dele kemu portun gleda kontra Crekvine, a nad njen je balkon. Va dele, ki je neč predelan i stavljene su veće poneštri, a portun mu j´z Lokvini su hodile va školu ženske od 1893. leta. Prej tega su ženske hodile, od 1877. leta, va školu pul Štrakotoveh, pokle va kuću kade je kašneje bival Nazor. Va ten predelanen dele kaštela je bil i stan za učiteljice na drugen pode, a poneštri su gledale va Polasiju. Tu pametin da je bivala Savka Zahija, učiteljica z Bodulije z svojun sestrun. Kad je pak 1921. leta počela se opirat građanska škola, razred za razredon sakega leta, je va ten novejen dele kaštela bivala na prven pode Pepa (Josipa) Brozović, udovica Žanetićini, kega san raneje spomenul, skupa z sini Slavomiron – zvali smo ga Slavko, i Ratimiron. Slavko je finil za učitelja skupa z Vitomiron Šundrićeven i Daneton od Minje Ciline. Ratić, tako ga i danas zovu, je neč kašneje šal va marinu za podoficira i tamo je ostal. Pepe ni bilo lahko z njijun plaćicun prit vanka i spejat na put va živote obadva sina, sama i prez muža, ma su obadva se pokazali vredni za se to ča je mat za njih mogla storit.
Od 1925. leta pa semo su muški i ženske hodili va školu skupa i to va staren dele kaštela. Pametin kad me je otac vadil va peten razrede bili smo samo muški, neč okolo četrdeset va oneh stareh, zlizaneh, dugeh klupah, puneh sakakoveh senjali. Ta se učionica zvala ˝konobina˝ aš se va nju šlo od portuna levo, zdolun po skalineh. Nekada za vreme kastavskeh kapitani je tu bila štala za konji i karoci kapitanove, a prihod je bil z Lokvini skroz veli portun. Hodil san va školu i va drugen dele kaštela kad san bil va građanskoj škole.

Dalje se produžuje Delavska škola, od portuna na pod, ma se lepo vidi da je kašneje zidana, posebe po skalineh i kolonicah pul njih za ča bi se moglo reć da je s početka ovega stoletja. Tu su hodili va školu si oni ki su se pripravljali za kakov art, a po ten je ova škola bila poznata celoj Kastavšćine kod mesto va ken se more navadit se, ča jenemu dobremu artižanu treba znat pa da mu delo prinaša korist.