Micini

Pride voltica skroz ku se gre do skalini, pa zdolun pul Lojzineh h Betotu. Na drugu stran te voltice pride kuća Micineh. Ma su samo Petru zvali Micina, a njijega muža Zvanića (Ivan Dukić), brata od Tončića Antičinega, zvali su Zvanić Petrin, aš je va kuće bil zet, a hćer Anku – Petrina, po matere, aš je mat držala va rukah komandu va kuće. Zvanić je svojni bil v Merike, prnesal od tuda talari i š njimi storil kuću z balkonon, va početke ovega stoletja, spod svojga vrta a do Božinove kući. Ča j´bilo va njoj ćemo malo pokle.

Petra je bila doma z Ankun, a Zvanić je imel voz, karocu, bolje reć kripu, i kalesin pa je ljuden prepejeval ča je kemu rabilo: z vozon seno sebe za konja i drugen, gnoj, drva z Lozi i Lužini, a s kalesinon je prepejeval meso od macela va bekariju Dragotu Konestabo. Karoca – kripa je pak bila za prepejevat oneh ki su se oteli po Grade pokazat da se moru s karocun pejat. Jedanput san videl kako je pejal v Opatiju Božota Dubrovića i ženu ki su šli  va vižitu hćere ka je bila oženjena za talijanskega kapitana i su živeli v Opatije. No tu karocu je retko bilo videt, najviše voz. Zvanić je nekoliko konji promenil ma mu je sakemu daval ime Pubi. Bi ga zipregal za finjenen poslon, dole na Lokvine, voz va kraj, a Pubi bi sam šal okolo sv. Trojice i napored školi zgorun pa va kalu pod crkvenen zidon, pored Polasije i Delavske školi  drito doma skroz oprta vrata va konobu, kade je čekala Petra, vezat ga pul jasal i mu dat jist. Ki ni znal da je konj tako navajen i navadan bi se zaplašil ako bi ga trefil okol Polasije – ma niš, Pubi je znal da gre doma i da ga čeka jist!

Jedanput se j’mogla storit nesreća. Zvanić je nekemu pejal gnoj nekamo z Grada nazdolun va vrt. Pod Volticun je zasanil, ma je sana pukla i težak voz je se jače rival konja zdolun, konj je nekako obrnul h kažotu Frane Banice i se je frmal na zide od Šundrićevega vrta, još malo pa va kažot. Ni mu bilo niš, ma j´moglo bit?! Od tega se je povedalo po Grade dva, tri dni pa se j´pozabilo. To je bila najveća saobraćajna nesreća va ono vreme.

Petra je zimala školani na fit, pametin neki Mađari.

Zad kućun su Micini, al Petrini, imeli lep vrt z ružami i sakakovun vrdurun, takov lep vrt je bil i pul nove kući, neč niže, ma tamo je bila posajena javorika i oleandri pa je zgledalo kod da je v Opatije al Lovrane.