Narodni dom

Slabeje su h Betotu počeli hojevat kad se 1930. leta uredilo Narodni dom, al pak kraće Dom, va ken je urejena manja sala, ma je va njen bilo nekako tepleje, intimnije, kod va svojoj kuće. A i vane lepi jogi, pa je tu bila čitaonica, a domar Andre Frlan Carić z Dolčića i njegova Pepica od Milih su umeli pripravit za popit i pojist. Tu su njin narasla i dečina Josip i Dobrila. Pokle je na ta Dom dozidan veli salon va plovansken vrte, za vežbat i za veće priredbi.
Pred Domon je Šikićeva fortica, podzidano mesto z dvemi maruni i okolo ferijada. Ostalo njoj je ime po neken majore Šikiće, ki je svojni živel va Dome, ta austrijski major je bil va penžijone kod i pred njen va istešoj kuće major Zamlić. Ta Zamlić je mej prvemi potpisan kad se j’ osnovala čitalnica va Grade „Složimo se“, 1866. leta. O ten govori spomenploča na Rudnarovoj kuće.
S tega Doma ima lepeh, ma i nikakoveh uspomen. Tu san, kade je danas sala, počel hodit va školu pul učitelja Franje Stanića Beličinega. Prvi razred Učiteljske školi san va toj istoj kamare finil, kad smo 1930. leta šli va veli palac pod Forticun. Va našu novu školu, smo se va Dome zbirali, mi već onda mlaji, i tu je s nami počel delat Marijan Buzdon Pizinov i pripravjat za prikaževat komedije B. Nušića i drugi dramski sastavi. Lepo smo bili pripravili „Sumnjivo lice“ i kod da sad gledan pisari: Svetko Koncijanić – pisar Vićentije i narečeni zet sreskega kapetana, Milisav pisar i bivši žandar je bil Miro Milčić Carov, Dušan Zvončićev pandur Josa, Valerija Kapetanica i Andrijana njoj hći, Kazo Turčićev je bil Spasa mehandžija, a Branko Grosmanov se celu komediju tužil na nekega Josifa iz Trbušnice da mu je neč dužan, i nikako dopovedet. Ivanić Zvončićev je bil apotekarski pomoćnik i „sumnjivo lice“, a ja sreski kapetan ki je na kraje najviše zivukal i komać se z sega skupa nekako škapulal.
To isto smo kašneje davali va Diračijen. Maksić Golub nan je zdolun na voziće pejal garderobu i rekviziti, a mej njimi je bil i bocunić vina. Marijan Pizinov je vavek govoril: „Malo popit prej neg greš na pozornicu, dobiješ koraj, a mera za popit je kad oćutiš da ti va ušijeh počne fumat!“. Kad smo prišli va Diračje i se uredili za nastupit, je zel oni bocunić. „Ćemo provat ako ča vaja?!“. Je moral jako nategnut bocunić, aš smo mi već po pute provali z njega.
Još smo pripravili va ten Dome nekoliko predstav. Pametin da san va „Povratke“ Srđana Tucića moral ubit Svetkota brijača, ja kod prevaren muž ki rovinan od dela prihaja doma. Smo to „ubistvo“ storili tako da je Svetko ostal prez senjala i zdrav. Bilo je to lepo naše vreme, bili smo mladi i prez skrbi, se je okolo nas bilo kod puno rožic i lepo je dišelo. Život se igral s nami: nas je pokle rashital po celoj Jugoslavije i nikad se već nismo si našli skupa. Za nami su prišli drugi, mlaji. Tako to gre po rede….
Grda uspomena je ostala kad je jenega pusta, nafuman Marijan Tomašić, sreski načelnik počel celemu orkestru, ki je na zabave sopal, zmerat da smo „prosvetna fukara“. Božo Brozović je zajeno zaprl klavir, si drugi su pobrali svoji instrumenti i smo šli ća. Zabava je ostala prez muziki. Ča mu je to bilo tako reć i toliko reć – mogli smo samo nagajat. Neč se ni, kod starešina Sokola, mogal složit z mojen ocen, al zato ni trebalo nas krivit, školani ki smo njin trebali celu noć sost, prez dinara. Je od tega leta pasalo 45 let. San bil doma i trefil Daneta Belega Lučića, kega nisan videl od prej rata. Povedal mi je ma me je prvo pejal pod lipu pred Zvaninovemi: „Na ten meste, one noći kad nan je Tomašić zmeral da smo prosvetna fukara, noć je bila jako škura, vetar je ferali po Grade pogasil, je jedan mej nami ovde špegal, ni mu se grustelo čekat Tomašića ki je nakraman prihajal neč va urede zet. Tako ga je oćepal, zmatafunal i zvritnjakal, da je Tomašić pozabil ki je i kamo gre. Je ovde ostal prit na se, a oni se je va noće zgubil“. Ta jedan mej nami je bil Slavko Brozović, Pepi Žanetotove. Mu je vrnul za seh nas. Druga grda spomen je ostala z vremena kada smo doma čekali će se opret Učiteljska škola va Grade i kada, al ne. To je bilo 1930. leta. Čekaj, čekaj, pa smo složili kumpaniju za pripravit komediju od M. Laginji „Šilo za ognjilo“. Smo se vežbali va ondašnjoj gombaone, to je veći prostor pod Nazoroven vrton, kade je pokle Andre Garić imel tišljariju. Lepo smo to bili pripravili, je se šlo dobro, samo nismo prosili nijenega starejega da nan pomore, sami smo to režirali. Jedino je Nevenko Dorinin nan prišal da bude graničarski oficir Milan Vojvodić, ja san bil sudac Tomašić, Marica Leletova, moja neputa, Gržinić Milivoj, Frane Antičin, fanat Borina i još desetak njih. Jakac, profesor nan je preporučil da to bude pod firmu „Bratovšćine“ ka je od raneje postojala za davat pomoć siromašnen, a vrednen, školanon, smo računali da će to pomoć najprej takoven z Grada, i poslušali Jakca. Uprava Učiteljske škole je još vavek bila va Dome za sen ten ča školi ni bilo.
Zvanina nan je dal gredi i daski pa smo storili pozornicu pred velun školun pod Forticun, bilo je leto, teplo i lepo pa se moglo vane prikazat ča smo pripravili. Jako se puno ljudi nabralo, na kase se pobralo okol 2500 dinari, a to je va ono vreme bilo jako puno. Va sred predstavi je naletel nekakov šijun, storil je veli daž i grmavac, pa smo morali prej vremena finit, a si ki su prišli gledat su se narivali va salu školi, kade je zajeno za ten, rano zapolne počel tanac. Zibrana je i „mis tanca“ Jerka Uretina. Šoldi od ulaznine smo dali Jakcu, njemu je pak to zel Josip Ribarić i razdelil školanon po Kirije i Bodulije po sto dinari da bi prišli, kad se škola opre, a da bi Ribarić mogal i dalje bit diretor. Za njega ni va Grade nijenemu bilo potrebno niš dat, „ovi te sejeno va školu prit aš drugamo nimaju kamo poć, da se ja osiguran z onemi ki te z vani prit“. Mi smo se bili sabrali pred Domon računajuć da te i nas neč pitat. Prišal je vanka Ribarić i stiral nas od skalini pred Domon, čekal je dokle ni i zadnji od nas pasal skroz portun vanka. Nisu mu to pozabili oni ken bi dobro prišlo i pol od onega ča je drugen zvan Grada bilo poslato. Ma zač nas je stiral, kakov je to čovek bil da ne progovori ni dve besedi z svojemi školani. Kad se škola oprla je bil diretor, ma ga nismo jako štimali, je vavek ostal na veloj distance od nas.
Vela sala dozidana zad Domon je storena kad san ja već bil šal od domi ća.