Nazorova kuća

Do Rečanićeveh je vela kuća va koj je svojni bival Vladimir Nazor, poeta i književnik, dokle je bil direktor Učiteljske školi va Grade. San spomenul raneje da je va toj kuće bila i škola za ženske, a pokle će ta kuća doživet puno sakakoveh fitovali. Nazor je tu bival z ocen Petron ki je va grade i umrl, z materun i jenun sestrun. Su povedale grasćice da je ta njegova sestra rada imela konja za jahat, je brata tentala da njoj ga kupi, a on je komać zihajal vanka z svojun plaćun, je bil diretor, ma ih je doma bilo četvoro za jist. San bil mići, ma san ga zapametil: Vavek je paseval po našoj kale pa pod Rusovu voltu i na placu, visok i drito se j´držal, cviker na nose, baštoncin v ruke, nogu pred nogu, uredan i speglan malo stareji mladić. Bi me pital: ˝ Šta to radiš, mali ? ˝- ja san neč kod otrok pred vrati prškal – ma nisan od velega rišpeta umel besedu mu odgovorit. Pametin i kad su se premešćevali va Zagreb, još nisu bili arivali Talijani. Je Predgrad prišal z Reki veli voz z dvemi još većemi konji, kakoveh nismo bili navajni vijevat pul nas, pa ta voz, kod da bi jedan vagon, ni mogal pasat skroz Volticu neg se j´frmal pred ložun. Mobiliju i se drugo su nosili po našoj kale Predgrad pa va ta voz – vagon. Mi smo va se to skupa zabljeno gledali.

Va toj su kuće pokle bile talijanske nekakove komandi, pa za vreme SHS bili su na pode žandarmi, a doleka dve učionice, jena veća za kemiju z veltrinami puneh sakakoveh stakleneh, napošneh bočic i većeh boc. Pa nan je tu Ante Mučalo, kad smo bili I razred Učiteljske školi tel pokazat jenu provu, a ta je za celo školsko leto bila i jedina. Je storil smešu za praskavac, ma je samo on bil blizu, a nan je ordinal da stanemo ča dalje se moglo. Je važgal i praskavac je puknul, ni ki zna kako puknulo, mi smo misleli da će shitit kod kanul, kad nan ni dal blizu stat.

Još iman jenu uspomenu z te kući, ma sad z druge učionice, ka je bila duplo manja od one z druge strani va koj je Mučalo hital. Va toj smo učionice imeli risanje kad san bil va II razrede građanske školi a vadil nas je to Pepino Zvončić Marot. To je bil kod kabinet za risat, klupi su bile neč veće i boje, nisu zgora bile rovinane. Bilo je podzime i na šterne, pred vrati se j´bil storil led okol grla, od vodi ka se j´prolela kad su ženske kalale vodu. Nekoliko nas, školani, smo se po ten lede risali, pozabili na školu i nismo abadali kad će od zdola z Lokvini prit Pepino, a nijedan ni ahtal videt ga na vreme. Već je bil pred portunon kad smo se mi zatekli, ki će prej, nutra va učionicu. Stali smo, tako se je pozdravljalo, seli i čekali svoje. Pepino je stavil dnevnik na stol i s prston samo pokazal na prvega po rede, kega je videl da se okol šterni risal. Stal je, i šal h njemu jedan morasti, slabašan, najmanji mej nami fantina od Matulj, pametin da se j´zval Afrić. Stal je preveć blizu tabli: Pepino mu je zašvistal takovu ćepu da mu je tabela dala drugu na drugi obraz, a Afrić je storil takovo lice, grimasu, da san se ja moral nasmet. Pepino je pokazal na me s prston, san šal s klupi vanka ma malo dalje od tabli, a on mi je šviknul takovu ćepu, kod da me j´ćapal oganj na levi obraz. I tako seh po rede ki su se pred vrati okol šterni risali. Celo zapolne ta dan mi je bil obraz kod da iman oganj, a črjen kod rit i rad tega nisan zapolne nikamo šal.

Tako, gore na pode žandarmi, dole dve učionice, bilo je do, more bit 1930. leta, kada su tu kuću znutri uredili, popravili, stavili moderni kondot z vodun, pa smo se va nju uselili: otac, mat i ja. Otac je bil dobil pravo živet va toj kuće dokle bude upravitelj školi. Učionice su i dalje, dole va prizemlje, ostale. Nan je bilo va toj kuće preveć prostora, jena kamara je vavek bila prazna, kod i vela kuhinja kontra vrtu, ki je bil spod kuće, a pod njun tri konobice, samo jena s poneštrun, druge dve kod kazamati. Nan je rabila samo jena od teh za drva, ka je pul vrat od pasaja za poć va vrt. Tu san imel svoju kamaricu va koj je bil armar, storen va zide. To je kamarica jušto nad portunon. Pul nje a h Rečanićeven je bila druga, takova kamara, kade smo storili da bude kuhinja, i na kraje veća kamara kade su spali otac i mat. Se drugo prostora je moglo uperat za još jenu manju familiju, ma je trebalo storit drugi prihod.

Mat moja, Mila, je od raneje bila bolna od jetri i bila je se slabeja va nogah. Ni njoj pomoglo puno ni ono sunčanje pul Savetoveh na sale na gornjen pode, tužila se je da njoj je se huje, duhtor Dabović je prihajal saki čas, su njoj preporučevali ovo i ono. Ni mogla već ni kuhat ni spravjat po kuće, aš ni mogla hodit. Rečanićevi su nan bili posudili jenu poltronu, va njoj je sedela va kuhinje po dneve, a ja san se bil pripravil za obed i večeru, kako mi je ona govorila ča trebe storit. ˝Ala kogo, to stori ovako, to zapeštaj, pripravi za ofrigat ribi, teci Ludviku kupit spežu za danas˝… i se tako kod ča je ona znala za red va kuće. Pod njijun komandun san navadil kuhat, ne ča je, je, nego baš onako kod ča je i ona umela i ča je navadila doma od materi pul Šundrićeveh v oštarije. Moji kumpanji su šli soldaton, a ja san moral odložit za leto dan, računajuć da će se mat okoverat, da more baren po kuće hodit. Otac je još vavek delal va škole, ma se je pripravljal poć va penžijon, pa su računali skupa poživet još koliko let i za mane videt da negde zaslužujen svoj kruh. Pepina Zvonova je i dalje bila saki dan pul nas za finit veći posli i posli ki muškemu ne gredu od ruki. Tako, se huje i huje, pasala je zima i prišlo mlado leto 1934. leta. San ih bil preselil va velu kamaru, ka j´bila svetleja i sunčaneja od one prej, računal san da će tu mat moć opet sunčat nogu, da će njoj to pomoć, da će na boje poć. Ma ni se moglo već niš storit. Mučila se j´ležeć, teško je stala z postelji, jetra njoj je jako natekla, zadnji dni ni nijenega okol sebe poznala i o mladen lete je va toj veloj kamare, 1934. leta, finila. Je imela šezdeset let a nijenega belega vlasa na glave. To mi je s te kući najteža, najbolneja uspomena, njija smrt, moje dobre materi, koj san bil četrti po rede a ostal jedini.

One konobice, va ke se gre z vrta, su mi bile moje carsrvo, za  posli keh ne treba saki videt ni za keh ne treba znat. To leto, dokle san se pul bolne materi vadil bit kogo, sako zapolne po dobren vremene san va većoj od teh konobic razloževal i složeval stare puški i pištoli. Vitomir mi je bil dal dvocevku pokojnega nonota Ližija Šundrića, storenu va Trste, na kapculi s petešići, ma je kundak bil zlomljen, za kega storit san bil nabavil orehovini. Drugu mi je dal barba Miro od pokojnega nonota Zvanića, jednocevku, malo grezeje storenu i tešku, kundak je bil strhnjiv. Vitomir mi je bil dal i jenu talijansku pištolu na bubanj, a Vojmir revolver, kakov se kod kauboji vidi na filmeh, pravi Colt, a i kalibar mu je bil sakramenski. To ča san rekal san čistil, limal popravljal kod starinu i spomen na moji nonoti i skrival va jenoj škuje va drugoj konobice. To se ni smelo onda imet va kuće od žandarmi, pa se je skrivalo.

Otac je šal va penžijon i bilo j´poć s kući vanka. Smo se preselili Davorinu Sankoviću va kuću na prvi pod. Čekal san poziv za poć soldaton i za Belun nedejun, zadnjun va našen Grade, san šal va Goražde na Drine, va oficirsku školu. Otac je doma ostal sam. Još će više ostat sam kada buden 1936. leta 12. marča šal va službu, va Srbiju, va koj san do danas i ostal.