Općina

Do Petrićeveh pride općinska kuća, al kraće Općina. Tu su svoji posli delaliglavar, kaser i drugi impjegati i ki fanat.
Pametin glavari: Franjo Jelušić Rečanić, ki je bil glavar za Kazimiron Jelušićen dokle nisu prišli Talijani 1918. leta. Za njiho vreme su na općine bili kumisari od njiheh ljudi. Neki Petar Juretić je bil tajnik, aš je neč š njimi držal. Kad su Talijani šli ća je glavar bil opet Rečanić, a za ten Mate Cucančić, klanjac, ki je bil glavar dosta let, dokle su Grajani imeli prvu besedu va politike, a to i va općine. Kad je pretegnula Vanjšćina, a Grajani su morali poć malo va kraj je glavar bil Tonić (Anton Širola) Brnas od Brnas. Ki je za ten bil ne moren reć aš san bil šal z Grada ća. Impjegati su bili: Nikola Žic je bil tajnik, za njen neki Paškvan s Kostreni, kaser je let i let bil Jožić Haramija z Čaval, pul njega se pripravjal za delat Drago Blečić Maretin od Dukić, vojni referent je bil Stipe Crnković, invalid, prez jene ruki, ma je va drugoj imel sakramensku forcu, malo stareji mladić ki je bival pul Sankovićeveh. Još pametin Svilokosa i još jenega Kordunaša. Si su ti prihajali i othajali ma je vavek ostajal Jovanin Sinčić Hrenić, općinski fanat.