Petrićevi

Do Belčeveh, malo niže pride kuća ku su zvali Petrićeva. Ki su to bili ne znan, pametin samo, kad san već bil mladić, da se mogal trefit v oštarijah po nedeje neki Francik Petrić, ma je živel nekade pul Ćiković. Va toj su kuće živeli moj otac i mat, od ženidbi 1906. leta pa   do 1925. al morda 1926. leta kada su se preselili Dirakoven va Pelini. Va toj kuće san rojen va kamare na prven pode koj poneštra gleda h općine, a to je bilo 10. marča  1914. leta, pa me je zato otac zval da san marčeni mačić, kad san bil malo veći me je zval tičić, a mat me j´zvala Josipic, aš je i ona, kod i se stareje grašćice govorila na c. Otac je po rode bil Jurinčev, a mat pak Šundrićeva. Prej mane su imeli još troje dece, ma su rano umrla, ja, četrti po rede, san se frmal, narasal i finil za učitelja doma va Grade, a sad kad ovo zapisujen iman 73 leta.

Smo živeli doma ni preveć lušo, ni mizerno, neč srednje, koliko se je moglo z plaćun mojga oca, aš je mat bila doma, kuhala i spravjala kuću, rada je skupa s manun šla prošetat do Spinčićevega kala, kade smo pul Pepini va butige čagod kupili za doma i vrnuli se na Jurjenići nazad doma, al pak bimo  si, otac, mat i ja šli prošetat v Lozu, al h Jurčićen do Milih, ki put i va Kut do Jelušić kade je bil očev rod. Pametin da je otac povedal kako je prej prvega rata imel 60 furenti plaću, to je bilo 120 krun, a da su za mobiliju bili dali v Reke 60 krun. Šoldi je otac daval matere, on je va takujine imel samo kakove munidi, slabo je pušil, po nedeje ku virjiniju, a pokle dva vardara na dan. V oštariju ni rad šal, raji je h kemu šal, skupa z materun, kade je bilo dobrega vina. S ten njegoven takujinon ga pamete njegovi školani, fantesini ki su h njemu hodili va V razred, doleka va konobine va kaštele. Bi storili kakovu falotariju, a otac bi doznal, bi se razjadil i hitil va kega oni takujin z munidun, munida se rastepla mej klupami na se strani. Bi mu to pobirali i vrnuli, ma on ni znal koliko je va takujine bilo, pa je bilo sakako. To mi je povedal Ivan Ivanov od Tometić ki je h mojmu ocu va školu hodil, a Bruno se je zato razjadil ča su jenega od teh fantesini, ovi Ivan i još jedan za nogi vukli po Stražnice zdolun, da mu je glava ozvanjala po skalineh. Ta Ivan je imel mlajega brata ki j´pak smanun va V razred hodil va onu ištesu konobinu, kamo je hodil i njegov brat, a ta se zval Milan, pokle po arte bekar.

Ja nisan oćutil ratne leta toliko kod ča je to bilo dečine va familijah kade ih je bilo više va kuće, za me jedinega su neč mogli nabrat da ne buden lačan. Koravu nismo nikad jili, a to se jilo va sakoj slabeje stojećoj kuće al familije, a to se delilo na aprovizacije va fonde Medvedićeve kuće pul cimitera.

Su videli ljudi da se ka vreća muki dala Nazoru, a da za drugeh ni bilo ni kilo,  ma je Nazor imel četiri va kuće za jist, a jenu plaću. Onda ni bilo ni kade ča kupit, ni bilo i ni. Pametin da san z materun šal Božine Rubešan, aš se čulo da ima nekakovega ula, su nan napunili bocu, ma kad je mat provala s ten ulen zasmočit je dišelo kod kad pasa tomobil, bilo je ule od repice, ono za nalevat va feralići kondukteri na vlake, prej ovega rata. Otac je moral obahajat, kad fini posal va škole, po Vanjšćine i popiševat ča ki paron va kuće ima, a ča bi se moglo zet da vojska ima ča jist. Na takove ˝popišje˝ je hodil više puti, bi zapisal toliko da se temu paronu ne more niš zet, i ovo ča ima mu je malo za njegovu familiju. Ma bi mu ljudi dali ča kompira al fažola, malo frmenti, negde i šenice, a pul premožnejeh ki kus panceti al špeha. Otac bi prišal doma z svojun valižicun, va koj su na vrhe bile harti za popisat, a zdola ono ča bi ljudi dali. Pokle smo ja i mat šli prejpolna do Milih Zorzakoven, ki su imeli žrva i puno dece, pa su nan tamo zmleli frmentu al šenicu. Ona dečina su obrnjala žrva pa je za čas bilo zmleveno. Mat bi mi pokle doma storila palentu, malo reju, pa bi va jedan štamp nalela pol, na to nekakove marmeladi ki zna od česa, samo ča j´bilo slatko, pa zgora drugu polovinu od one palenti. Kad se to ohladilo je bilo kod jena torta, a ja bin pritekal doma lačan, zel bin kus te torti i opet poć vanka teć i igrat se. San već spomenul da su mi Poljaci, austrijski soldati narezali na pode pul Pepeta Rusa špeh va baretu, a ja nisan znal ča su mi to narezali, tekal san brzo doma matere pitat. Neč je boje bilo kad su prišli Talijani, aš je rat bil finjen, ljuden s Kastavšćini se ni niš zimalo, je bilo i ča kupit aš su Talijani pripejevali da bi pridobili naši ljudi na svoju stran, jedan od njih, se je zval Marinello je oprl butigu pul Marineh sen i sačeren.

Nan su pak va kuću bili prvi dan, ča su Talijani prišli, pripejali h večeru prvega komisara za općinu ki se j´zval Umberto Sala, kapitan, Sardenjol, ma š njen je bilo lahko, je brzo šal nekamo ća, ma je prišal drugi: Alesandro Bucianti, kapitan, kemu je familija živela va Egipte a on se prišal tuć ˝Per Italija grande˝ z Istrun i Dalmacijun skupa. Treti kega pametin je bil Giovanni Fraiola, kapitan, ki je bil ˝pust me ća˝- baš ga je bilo briga za se ča se onda propagiralo od njihe strani da bi njin ovi naši kraji ostali, on je bil zmašćen i pokapan od likeri, rad je igral na karti i puno j´pušil. Po noće je grdo kašljal da ni nan dal spat.

Mane su više pijažali furišci aš su s manun radi se igrali, navadil san š njimi talijanski govorit ča ocu ni bilo pravo, su mi načinili vozić, a bi prnesli i kakovu konšervu mleka al pak salmona (lososa), ki put ku naranču al bonboni. To su bili Giovani Fufini z San Severa, provincia di Foggia, Davide Scala, Kalbrez i Camilo Cerone, Napolitan, črn i grd, ma dobar. Najviše mi se kod otroku pijažal Davide, ki je umel s manun kod z svojen otrokon, takov je nekako bil.

Si su mi ti Talijani bili zločesti i nikakovi kad su 1921. leta o mladen lete zaprli mojga oca i pejali ga va Trst va pržun San Giusto. Mat se zmućevala ča će š njen bit baš va to vreme, kad se već siguro znalo da Talijani moraju napustit Kastavšćinu i poć od kuda su i prišli. Pokle šetimanu dan se j´otac vrnul, neobriven, vas zmašćen i pun šenac – se je bila oženila, al je otroka rodila, nekakova prinčipesa od Savoji, pa su seh pustili ki još nisu bili osujeni, pa tako i mojga oca.

Talijani su tega leta šli, ma je kunfin presekal Kastavšćinu napol: veći del teritorija njin, manji semo h nan. Od Reki su sklepali nekakov ˝corpus separatum˝, trebalo je to bit kod Danzing med Poljskun i Nemačkun. Ma j´prišal D´Anunzio z svojemi arditi i se to pokvaril, va dočuhe z onemi va Rime, storil je v Reke konfužijon, z talijanskeh brodi va porte su par puti hitili kanul na palac guvernera da bi se reklo kako to D´Anunzio dela na svoju, i na kraje su v Reku umarširali talijanski soldati, kod za storit reda, i va njoj ostali se do 1943. leta. S poneštri na šufite san gledal kako su kanuli z brodi hitali va Reku.

Mi smo pak, z ovu stran, dočekali srpski soldati, ki su od Gromišćini prišli 26. maja 1921. leta i oslobodili Kastavšćinu do ondašnjega kunfina, ki je bil pul Rubeš pa na Tometići, Trinajstići i zgorun do na Vrh –  Lozi. Grad se j´bil napunil ljudi, ki su prišli z ove i z one strani kunfina, muzika je vojna sopla, videli smo prvi put kako se igra kolo, bile su pune oštarije, sakuda se kantalo i pilo, a pul Betota je bil veli banket za pozvani. Moj otac je ti dni imel velega posla: njegovo je bilo obać dobri gospodari, ki će koliko pršut i dobrega vina dat, neki morda i šoldi, za ča lepše dočekat našu vojsku. Mane je mat pripravila: su mi ušili črjenu stomanjicu, imel san modre bragešice, a na glavu san prvi put mogal stavit dalmatinsku bareticu s cindrići zada – otac je govoril da zgledan kod jedan garibaldin.

Je to se pasalo i ljudi su se obrnuli saki na svoje delo, ma ni sada saki imel dela, preko v Reke se je se pripravjalo za fašizam, za naši ljudi odovde ni tamo već bilo dela, novi kunfin je prnesal više dišturba i mizerije, za sen ten ča je drugen neken bil jako koristan, aš su počeli delat kuntraband i na ten zasluževat. Su povedali za Marijana Cesarića da zame banknotu od deset dinari i š njun važge španjolet – ma takoveh ni bilo puno, više je bilo oneh mićihneh ki su s preka prehitili ko kilo cukara, al kafa, al ča drugo ča se na ovu stran dobro prodavalo. A z naše strani je se više na drugu prehićevan tabak, po celi kasuni za jenu noć, aš talijanski tabak ni najboji.

Ne znan radi česa, ma smo se morali preselit z ove kući, pa smo šli na fit Dirakoven va Pelini na drugi pod. Kašneje je va ovoj kuće bival Nikola Žic, impjegat z općini, kad se bil po drugi put oženil z Marijun Milčić, Carovun, s kun je imel hćer Zvezdanu.