Polasija

Sada ćemo poć po skalineh pul Tajčini zgorun pod jedan veli marun pa dalje po kale zad Delavskun školun do jenega mesta, kade se danas naziru samo fundamenti od neke kući. Va vreme od kega pišen ča pametin je tu bila kuća na pod, duga za četire al pet poneštar ku su zvali Polasija. Ni va njoj bival nijedan, bila j´zapušćena i rovinana, podi strhnjiveli, lanti od poneštar prez stakal, ka od njih je visela na jenoj britvele, na vraten za poć nutra samo pol portuna, melta z nutri i na štukeh popucala, i na gornjen pode su se lepo videle gredi, krov je pušćal – se skupa jena mirina. Povedalo se j´da je to svojni bila plovanija, ča bi moglo i bit, aš je zgora nje Popov turan, a zad te napušćene kući se šlo va plovanski vrt skroz zidini od Grada. Za vreme okupacije 1918. do 1921. leta su talijanski soldati tu držali muli va prizemlje, a mi, dečina, smo se okol soldati i mul motali i krali karubi (rogač, rožići) keh su pune vreći bile naštivane pul zidi. S temi karubi su futrali muli, a nan su se jako pijažali aš su bili mehki za hrustat i slatki.