Rečanićeva kuća

Sad pride na red Rečanićeva kuća va ku se prihajalo po skalineh na skod z šternun kade su va jenen kraje bile konobice za kokoše i za drva, aš kuća ni imela konobu pod sobun. Kuća je bila na pod i va njoj je bival Franjo Jelušić Rečanić, alvokat z ženun z Reki i sinon Fedoron (Feodor) i hćerun Jerkun (Ljerka). Kad još nisu bili šli na Sušak, negde za 1923. leton, je š njimi bila devica Tereza, jako stara, za malo pa za umret. Ča je ona mogla storit va kuhinje i po kuće kod devica ni se moglo puno povedet, su je prigledali siguro do smrti. Kad su se skroz nekoliko let vrnuli opet va Grad bivat imeli su za devicu Jeniju (Eugeniju), sestru Marije Dolfota Šundrića.
To se va Grade računalo kod vela, gosposka kuća. Franjo se ni delal veli gospodin, ma je do tega držala njgova gospa za ku ne znan kako se j´zvala. Bil san pul njih dokle smo bivali pul Petrićeveh, igral se z Fedoron, ki je imel sakakoveh igralac i mej njimi velega, drvenega konja na ken se moglo jahat i cimbat se napred – nazad. Se bi ta igralca on prnesal vanka ma ne samo pokazat, nego da se skupa š njen igramo i brzo bi pasalo prejpolne al zapolne. Pejal me je i po kuće kad ni bilo doma oca i materi, pa san videl velu kamaru z još većemi zrcali i nekoliko poltron – to se zvalo salon.
Franjo je nasledil Kazimira Jelušića, kad je umrl, pa je do prve okupacije od Talijani bil glavar na općine, a za vreme te okupacije su bili na općine komisari – Talijani.
Kad su se drugi put vrnuli va Grad bivat je Franjo oprl avokaturu va kuće kade je bil općinski sud – pul cesti na desno kad se šlo na Šporovu jamu. Pul njega je delal kod pisar Nando (Ferdinand) Srdoč, ki j´raneje bival pul Dalice Srdočeve va Pelineh, pa je kašneje 1935. leta finil za učitelja. Ja san već bil šal od domi ća kad su se oženili Nando i Jerka, a Fedor je studiral za inžinjera. Ljerku i Nandota san trefil i 1945. leta, kad san se vrnjal z Zagreba va Beograd kod kurir z 1. Armije. Trefili smo se na štacijone va Bjelovare, ki je to prejpolne bil blokiran, aš su pripadnici KNOJ-a pretresali kući va ten dele grada okol stanice.
Nisan spomenul na početke da su Rečanićevi imeli del kući – graski turan, ki je kod terac bil predelan za sedet vane po lete i lepen vremene, a s kega je bila višta na more kod i pred velun crekvun. Još i boje aš je spod turna zirasla bila vela i debela ladonja ka je nad tun teracun na turne delala gust i ugodan hlad.