Rošotova kuća

Na Rusovu kuću pride kod h njoj stišnjena manja kućica va koj je nekada živel neki Rošo, po arte postolar. Od te kući je bila i prva žena Božini, mat Marije Tepešovoj i Klementine Đurota brijača. Mej dva rata je tu prišal bivat Jakov Gošnjak z ženun Marijun i sinon, kega su zvali Edi (Eduard). Jakov je na kotare, kašneje na sreze, bil služitelj kod invalid aš je bil prez jenega oka.

Jeni su skalini za prit pred vrata Rošotoven, a malo fali napored su drugi, širi skalini za poć glavarovoj kuće. Glavarova se je zvala aš je va njoj živel i glavaroval Kazimir (Miro) Jelušić kega su samo najbliži, brat Ludvik i sestra Tilda i drugi od bližega roda tako zvali, dosta je bilo va njegovo vreme reć glavar pa se je znalo da je to on. I njegovu ženu ni nijedan zval Arnešta, samo najbliži po rode, saki je znal kad se reče gospa glavarica, ka je to. Povedaju da je pod Austrijun let i let bil na općine glavar, da je puno tega dobrega za općinu storil, da je zajeno z Nazoron knjigi pisal, da je bil agilan va društve ˝Istarska vila˝ i da je za društvo umel se uredit i storit da bude kako treba i za društvo i za cesarske vlasti, ke nisu baš jako rada simpatizirale to ča Grajani kantaju, tamburaju, ča se okupljaju i gredu po seleh i po drugeh mesteh va Liburnije i Slovenije – aš je njin se to skupa dišelo da gre kontra Austrije, kontra cesaru i kontra semu onemu kako su oni oteli va teh našeh krajeh predelat i na svoju vodu obrnut. Ja, ma je Miro to umel lepo zgladit da bude dobro i jenoj i drugoj strane. Je umrl pred kraj prvega rata.