Rusova kuća

Prvo pride Rusova kuća, od kontradi na dva poda, ma njoj je prihod s kali ka pul općinske kući pasuje pod voltun zgorun h Belčeven. Z gornju stran ima skod za drugi pod a na prizemlje se pride z te kali. Dole va prizemlje je živel Pepe (Josip) Rus, tako su ga zvali a kako se je pisal ne znan. On je prihajal vanka, ma njegova žena nikada. To znan aš smo 11 let bili susedi, mi smo bivali va Petrićevoj kuće, ma tu ženu nikada nismo videli, čula se ki put da neč govori skroz priprt portun Pepetu ki j´stal vanka.  Nikad je nisi videl kako ćeš njoj znat kako se j´zvala. Morda negde 1930. leta je ta žena umrla, a Pepe je zajeno za ten našal drugu, morda preveć mladu za svoja leta. Grasćice su povedale da je sakega vraga proveval da bi ča s tun mlajun ženun moglo bit, da se je i z iglami badal, ma ni moglo bit niš, preveć je zatardigal. Su ostali živet prez tega, jedan ča ni tega, a drugi ča ne more.

Na pode pak z gornje strani je neko vreme bival Miho Spećina dokle se ni preselil va Koširovu kuću. Ki j’ još tamo drugi bival ne znan. Pametin jako dobro da su mi, kod otroku od tri, al četire leta, neki soldati va ten kvartere na gornjen pode Rusove kući, narezali va bareticu špeha, a ja san za ten tekal doma mater pitat ča je to ča mi je va barete. To je bilo jeno ratno leto a soldati su bili z Poljske. Su imeli konji va štale na Crekvine, pa su nas, dečinu stavljali pred sebe na konja i šli va komun, va Lozu, da tamo konji pasu.