Turčićevi

Poć malo zgorun do glavne kontradi pridemo pred vrata Turčićeveh. Kuća je na pod, a z jene strani portuna je neko vreme bila bekarija. Pametin oca Lojzota (Vjekoslava) Munića, Turčića, ki je bil već va leteh, a po arte je bil bekar. Je bil već molal, ni mogal delat svoj posal, za sen ten ča je to bil neko leto proval, ma mu ni šlo za rukun aš mu je njegovo vreme bilo pasalo. To je svojni bil jako okretan, vredan i sposoban artižan, jedan od najvrednejeh ki su storili va Grade društvo ˝Istarsku vilu˝- je ga videt na obadveh slikah va knjige ˝Spomenici˝. Mat Ane, njegova žena, mučila se z decun zipejat ih nekako vanka da budu svoji, delajuć neč grunta ča su imeli. Pametin da je vavek na Crekvine vela fažol, a inače si ju mogal saki čas videt pred vrati od kuće, više nego va kuće, bila je rada čagod više čut i doznat. Hćeri su bile Marica, Milena i treta, koj ne pametin ime, i sin Kazimir, ki je finil za učitelja pa j´šal na prvo mesto delat va selo Priznu pod Velebiton. Va škole je bil dobar sopac va klarinet i trombon i vavek vredan član va školsken orkestre, a bil je za kanat kod dobar bariton, ma više h basu podoban. Teško su, jako teško živeli, posebe onda kad je otac Lojzo umrl i se j´ostalo na Anete. Kazo je bil dobar i za kumpaniju pa smo on, Ivanić i ja po lete posejevali pul Daneta postolara i smo njin, njemu i lavorantu Iviću Pilepiću, z gušton kantali se ča smo umeli: Ivanić i ja gornji glas a Kazo je dobro basiral. Danetu se j´najviše pijažalo da se zakanta: Od Urala do Triglava…
Danas ni obedveh – sam se spamećujen na tempi passati…