Učionice Učiteljske školi

Do Nazorove kući, ka bi se i danaska mogla tako zvat u spomen na velikega pesnika i borca za ovo današnje, je kuća storena 1912. leta, ako se nisan prevaril, za potrebi Učiteljske školi i ima dve učionice, jednu prizemno, drugu na pode. Va toj na pode san vadil II, III i IV razred a učitelj mi je bil Josip Baćić – po domaću Pepić Picigera, a va onoj dolnjoj smo imeli risanje va I razrede Učiteljske školi, kad nas je vadila Antica Škarpa. Tu su bile lepe, vele, zelene klupi, komodne za risat, nas školani ni bilo puno pa je bilo dosta mesta. Risali smo po modele: ruku, profil lica i još tako ča, a pametin da mi je model bil pokojni Dušan Piezzi od Frankine Klementini, kemu san za svako poziranje na kraje daval jenu krušvu. Zadovoljan ja, zadovoljan on.