Babini

Na dno skalini, ke san spomenul je portun za poć Babinen. Tu je živel Frane Pepi babi, Pepa baba i njihov sin Adamić, pokle neč i hćer Duša. Frane je bil Merikan, to će reć da je hodil v Meriki delat, vrnut se z neč talari, pa kad škarsa opet nazad v Meriki na delo zaslužit još talari, dokle sa forca čovekova ne ostane tamo, preko oceana, a semo doma se vrne ostatak od žesnega mladića kakov je nekad bil. Frane je se mogal vavek videt va merikansken overale, bril se je sako jutro aš je tako preko vele vodi navadil, nosil je postoli z širokun puntun, ni samo nosil klobuk z velen obodon kot ča su nosili drugi Merikani. Pepa (Josipa) je bila s Korenskega, je pobirala dečinu kamo bi je pozvali pomoć mladoj rodit, a i starejen, po Grade ma više po Vanjšćine. Dečinu san pustil i fantinu i otroče kad san šal ća. Do kuće, treba reć, imaju lep, manji vrt.