Baničićevi

Na drugu stran ove kalice pride veli i lepo urejen vrt Andreta Baničića Dukića. Ta je vrt svojni bil Jurinčev, Andre ga je kupil kad se vrnul z Meriki i tamo dosta zaslužil talari, kuću na kraj vrta je, svoju starinu, popravil i opredelal. Imel je hćer od druge ženi ka je oženjena za Stanka Spinčića, s ken biva na vrh Belićeve rebri. Od prve ženi je hćer ka se oženila za Milana Salkovića, ki je pul Ludvika delal va butige, a su kupili gornji pod va kuće obedveh Em pul Dukić, doma je pak ostal Nevenko, po arte dimnjačar, ma to ne dela, ki se pak oženil sestrun Milana Salkovića z Mošćenic. Nevenko doma dela, a ima i ča delat, najprej va vrte okol kući, pa i va grunte ča nekade imeju.