Bondetova kovačija

Spod Lukove šterni, preko puta je Bondetova kovačija. Tu su svojni delali Bondetovi, poznati kod dobri kovači za sakakove potrebi od železa, ke ljuden rabe. Va vreme od kega zapisujen je tu neko vreme imel kovačiju Pepić Baničić (Josip Dukić) a š njen je delal njegov sin Stanko.
Hći Pepića Baničića, Mila, je tu, va Lukoven vrte storila lepu kuću, ne za bivat, neg za prostor kade je plela sake sorti pleteninu: bluzi, džemperi, kalceti i drugo – a to je prej tega delala doma, dosta va tesnen. Drugi del te kući je bil za kovačiju va koj dela Stanko Baničić, dokle bude mogal, aš je i on va leteh.

Z oven sen smo finili kuće Predgradon.