Božinova kuća (Tone Martić)

Kontra Valesiovoj kuće pride kuća ka je bila Božinova, a va njoj je bival Anton (Tone) Martić od Martić, općinski lugar, a kad je šal va penžion je na njegovo mesto prišal njigov sin Milan. Va toj kuće je raneje bival Ante Rišlavi z svojemi dokle se nisu preselili va Medvedićevu kuću. Po ten koliko je Tone Martić va toj kuće živel z svojun familijun – z ženun, z drugen sinon Bertoton i hćerun bjondastun, koj ne pametin ime, i kod da je bila još jena hćer – se more videt aš su va vreme, ko zapisujen, vavek rekli „pul Martićeveh“. Bili su poznati i po ten ča su imeli jenega velega, žutega maška, ki je velu škodu delal po kućah va Pelineh, mej kunelići i mej pilići, kade ih je bilo.